25 އަހަރުން ދަށުގެ މީހުންނަށް ދުންފަތުގެ އިސްތިއުމާލުކުރުން މަނާކުރުމުގެ ވިސްނުންފުޅު ގެންގުޅުއްވާކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

"ރައްޔިތުންނާ އެކު" ޕޮޑްކާސްޓުގައި ވާހަކަފުޅުދައްކަވަމުން ރައީސް ވިދާޅުވީ މަސައްކަތް ކުރައްވަނީ ހަގީގަތުގައިވެސް ދުންފަތް އިސްތިއުމާލުކުރުމުގެ މައްސަލަ ހައްްލުކުރުމަށް ކަމަށެވެ.

ރައީސް ވިދާޅުވީ ދުންފަތުގެ އިސްތިއުމާލުކުރަން ފެށުމުގެ ކުރިން އެކަން ހުއްޓުވިއްޖެނަމަ އެއީ އެންމެ ރަނގަޅު ގޮތް ކަމަށެވެ. އަދި ދުންފަތުގެ އިސްތިއުމާލުކުރަން ފެށިތާ ގިނަ ދުވަސް ނުވާ ކުދިން އެކަމުން ސަލާމަތްކުރަން ފަސޭހަވާނެ ކަމަށެވެ.

އެގޮތުން ދިރާސާތަށް ކުރުމަށްފަހު ކެބިނެޓް ޕޭޕަރެއް ހަދަން ހެލްތް މިނިސްޓަރާ ހަވާލުކޮށްފައިވާނެ ކަމަށާއި ކަމާ ގުޅޭ ރާއްޖޭގެ ކަމާބެހޭ ފަރާތްތަކުގެ ވެސް މަޝްވަރާ ހޯދައި ވަރަށް ތަފްސީލުކޮށް ބެލުމަށްފަހު ގޮތްތަކެއް ނިންމަވާނެ ކަމަށް ރައީސް ވިދާޅުވިއެވެ.

ހުށަހަޅަން ނިންމާފައިވާ ގޮތްތައް:

  • 2007 ވަނަ އަހަރުގެ ޖެނުއަރީ 1 އިން ފެށިގެން އުފަންވީ ހުރިހާ ކުދިން އަދި އުފަންވާނެ ހުރިހާ ކުދިންނަށް ސިނގިރޭޓާއި ދުންފަތުގެ އިސްތިއުމާލުނުކުރެވޭ ގޮތަށް ހެދުން
  • 2004 ވަނަ އަހަރުގެ ޖެނުއަރީ 1 އިން ފެށިގެން އުފަންވީ ހުރިހާ ކުދިން އަދި އުފަންވާނެ ހުރިހާ ކުދިންނަށް ސިނގިރޭޓާއި ދުންފަތުގެ އިސްތިއުމާލުނުކުރެވޭ ގޮތަށް ހެދުން
  • 2000 ވަނަ އަހަރުގެ ޖެނުއަރީ 1 އިން ފެށިގެން އުފަންވީ ހުރިހާ ކުދިން އަދި އުފަންވާނެ ހުރިހާ ކުދިންނަށް ސިނގިރޭޓާއި ދުންފަތުގެ އިސްތިއުމާލުނުކުރެވޭ ގޮތަށް ހެދުން

ރައީސް ވިދާޅުވީ ފަންނީގޮތުން މަޝްވަރާކުރުމަށްފަހު ގާނޫނެއް އުފައްދައިގެން މި 3 ގޮތުން ކުރެ ކޮންމެވެސް އެއްގޮތަކަށް ދުންފަތުގެ އިސްތިއުމާލުކުރުން މަނާކުރައްވާނެ ކަމަށެވެ. އޭރުން ކުރިއަށް އޮތް ޖީލު ސަލާމަތްކުރެވޭނެ ކަމަށް ރައީސް ވަނީ ވިދާޅުވެފައެވެ.

މިހާރު ވޭޕް މަނާކޮށްފައިވާކަން ފާހަގަކޮށް ރައީސް ވިދާޅުވީ ދެން އޮތް އަމާޒަކީ ސިނގިރޭޓާއި ދުންފަތުގެ އިސްތިއުމާލުކުރުމުން ޒުވާނުން ސަލާމާތްކުރުން ކަމަށެވެ. އަދި ބާރުއަޅަނީ އެކި އުމުރުފުރާގެ ފަރާތްތަކުން ވެސް ދުންފަތުގެ އިސްތިއުމާލުކުރުން ހުއްޓާލުމަށް ކަމަށެވެ.

ސިނގިރޭތް އެތެރެކޮށް ވިޔަފާރި ކުރާ މީހުން އެ ވިޔަފާރިދޫކޮށް އެހެން ވިޔަފާރިއެއް ކުރުމަށް ރައީސް ވަނީ އެދިވަޑައިގެންފައެވެ.