ސައުދީ އަރަބިއްޔާއަށް މިއަދު ޝައްވާލު މަހުގެ ހަނދު ފެނި މާދަމާއަކީ 1446 ވަނަ އަހަރުގެ ފިތުރު އީދު ދުވަސް ކަމުގައި ކަނޑައަޅައިފިއެވެ.
މިކަން ސައުދީ އަރަބިއްޔާގެ ޝާހީ ގަނޑުވަރުން ވަނީި ކަށަވަރުކޮށްދީފައެވެ. އެގަނޑުވަރުން ބުނެފައިވަނީ ސައުދީގެ ސަރަހައްދުތަކަށް ޝައްވާލު މަހުގެ ހަނދުފެނިފައިވާތީ މާދަމާއަކީ މިއަހަރުގެ ފިތުރު އީދު ކަމަށް އެގައުމުގެ ސުޕްރީމް ކޯޓުން ކަނޑައަޅާފައިވާ ކަމަށެވެ.
ސައުދީ އަރަބިއްޔާގެ ނޫސްތަކުން ބުނެފައިވަނީ ޝައްވާލު މަހުގެ ހަނދު އެގައުމު މައި ދެ އޮބްޒަވޭޓަރީ ކަމަށްވާ ސުދައިރު އަދި ތުމައިރަށް ވެސް ފެނިފައިވާ ކަމަށެވެ.
ސައުދީއަށް ޝައްވާލު މަހުގެ ހަނދު ފެނިފައިވާ ނަމަވެސް އިސްމާލީ ބޮޑެތި އެހެން ގައުމުތަކަށް މިއަދު ހަނދު ފެނިފައި ނުވާތީ މިއަހަރުގެ ފިތުރު އީދަކީ މާޗު 31 ކަމަށް ވަނީ ކަނޑައަޅާފައެވެ.
މިގޮތުން، އިންޑޮނޭޝިއާ، މެލޭޝިޔާ، އަދި ބްރޫނާއީ ފަދަ ގައުމުތަކުން ފިތުރު އީދަކީި ހޯމަ ކަމަށް ނިންމާފައިވާ އިރު ދެކުނު އޭޝިޔާ ސަރަހައްދުގައި ހިމެނޭ ރާއްޖޭގެ އަވައްޓަރި ދެ ގައުމެއް ކަމަށްވާ އިންޑިއާ އަދި ބަންގްލަދޭޝްއިން ވެސް ނިންމާފައިވަނީ ފިތުރު އީދަކީ މާޗް މަހުގެ 31 ކަމަށެވެ.
އެގައުމުތަކުން މި ގޮތަށް ނިންމާފައިވަނީ ފަލަކީ އިލްމުވެރިންގެ މަސައްކަތްތަކާ ޝައްވާލު މަހުގެ ހަނދު ހޯދުމަށް އެގައުމުތަކުގެ އޮފިޝަލުންކޮށްފައިވާ މަސައްކަތްތަކަށް ބިނާކޮށް ކަމަށް މީޑިއާ ރިޕޯޓްތައް ބުނެއެވެ.
