އިފުރު އައިލެންޑް މޯލްޑިވްސްގައި މަސައްކަތް ކުރާ އިންޑިއާ މީހަކު ގެއްލިގެން ހޯދަން ފަށައިފިއެވެ.
އެމްއެންޑީއެފް އިން ބުނީ އިފުރު އައިލެންޑް މޯލްޑިވްސްގައި މަސައްކަތް ކުރާ އިންޑިއާގެ އުމުރުން 26 އަހަރުގެ މީހަކު މޫދަށް ގެއްލިގެން ރިޕޯޓު ކޮށްފައިވާ ކަމަށާއި، އޭނާ ހޯދުމުގެ މަސައްކަތް ކުރަމުންދާ ކަމަށެވެ.
މި ރިޕޯޓު އެމްއެންޑީއެފް އަށް ލިބިފައިވަނީ މިމަހުގެ 27 ވަނަ ދުވަހުގެ 16:41 ގައި ކަން ފާހަގަކުރަމުން އެމްއެންޑީއެފް އިން ބުނީ އެ މީހާ ހޯދުމަށް ކޯސްޓްގާޑް ފަސްޓް ސްކޮޑްރަންގެ ހާބަރު ކްރާފްޓާއި ސީ އެމްބިއުލައިސް އަދި ފުލުހުންގެ އެހީތެރިކަމާ އެކު ކަނޑުމަގުން 74.18 ސްކެއާ ނޯޓިކަލް މޭލު ބަލައިފައިވާ ކަމަށެވެ.
މީގެއިތުރުން ވައިގެމަގުން 213 ސްކެއާ ނޯޓިކަލް މޭލަށް ބަލާފައިވާ ކަމަށާއި، އިފުރު މޯލްޑިވްސް ރިސޯޓް މުވައްޒަފުންގެ އެހީތެރިކަމާ އެކު ޑައިވްކޮށްގެން 16،0718 ސްކެއާ މީޓަރުވެސް ބަލާފައިވާ ކަމަށް އެމްއެންޑީއެފް އިން ވަނީ ބުނެފައެވެ.
ދާދިފަހުން މި މަހުވެސް ވަނީ ވ. ފުލިދޫ ކައިރިއަށް ފީނަން ގޮސް އުޅެނިކޮށް ގެއްލުނު 7 ފަތުރުވެރިއަކު ކަނޑުމަތިން ހޯދައި އެމީހުން ސަލާމަތްކޮށްފައެވެ.
ރާއްޖެއަށް ޒިޔާރަތްކުރާ ފަތުރުވެރިންނާއި، ރިސޯޓުތަކުގެ މުވައްޒަފުންވެސް ފީނަން ނުވަތަ ސްނޯކްލިން އަށް އެކި ސަރަހައްދުތަކަށް ދާ އިރު، މިފަދަ ހާދިސާތައް ދިމާވެފައި ހުރެއެވެ. ހާއްސަކޮށް މޫސުން ގޯސް ދުވަސް ވަރު މިފަދަ ހާދިސާތައް ހިނގާކަން ފާހަގަ ކުރެވެއެވެ.
