ބޭންކް އޮފް މޯލްޑިވްސް (ބީއެމްއެލް)ގެ ޑިރެކްޓަރުންގެ ބޯޑުގެ އާންމު ހިއްސާދާރުންގެ ފަރާތުން އިންތިހާބު ކުރާ 3 ޑިރެކްޓަރުންގެ މަގާމަށް ކުރިމަތިލުމަށް ހުޅުވާލައިފިއެވެ.
އެ ބޭންކުން މިއަދު ކުރި އިއުލާނެއްގައި ބުނީ، މި މަގާމަށް ކުރިމަތިލެވޭނީ އުމުރުން 30 އަހަރާއި 70 އަހަރާ ދެމެދުގެ ފަރާތްތަކަށް ކަމަށެވެ. އަދި އެ މަގާމަށް ކުރިމަތިލާ ފަރާތުގެ މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ޕްރުޑެންޝިއަލް ރެގިއުލޭޝަންގައި ންކޮށްފައިވާ ފިޓް އެންޑް ޕްރޮޕާޕްރޮޕާ ރިކުއާމަންޓްސް ފުރިހަމަވާންޖެހޭނެ ކަމަށް ވެސް އެ ބޭންކުން ބުނެއެވެ.
އަދި އެކަމަށް ހުށަހަޅާ ފޯމު ބަލައިގަންނާނީ ބީއެމްއެލްގެ ހެޑް އޮފީހުގެ 6 ވަނަ ފަންގިފިލާގައި ހުންނަ ކޯޕަރޭޓް އެފެއާޒް ޔުނިޓުންނެވެ. މީގެ އިތުރުން މަގާމަށް ކުރިމަތިލާ ފަރާތްތަކުގެ ހުންނަން ޖެހޭ އިތުރު ޝަރުތުތަކަކީ:
- ބޭންކިން، މާލީ ހިދުމަތްތައް އަދި އިންވެސްޓްމަންޓް ވިޔަފާރިއާ ބެހޭ އެކަށީގެންވާ މައުލޫމާތު ލިބިފައިވާ މީހަކަށްވުން
- މަތީ ދަރަޖައިގެ އަހުލާގީ މިންގަނޑުތަކެއް ހުރުން.
- ބަނގުރޫޓުވެފައި ނުވުމާއި، ސާބިތު ދަރަންޏެއް ނެތުން.
- ވައްކަން، މަކަރާއި ހީލަތް، ހިޔާނާތް ފަދަ ކުށެއް ސާބިތުވެފައި ނުވުން.
- ސަރުކާރުގެ މިނިސްޓަރެއް ނުވަތަ ކެބިނެޓް މަގާމެއްގައި ހުރި މީހަކު ކަމުގައި ނުވުން.
ކެޕިޓަލް މާކެޓް ޑިވެލޮޕްމަންޓް އޮތޯރިޓީގެ ކޯޕަރޭޓް ގަވާނަންސް ކޯޑުގައިވާ ގޮތުން، ކޮންމެ ޑިރެކްޓަރަކުވެސް މާލީ ރިޕޯޓުތައް ދެނެގަތުމުގެ ގާބިލުކަން ލިބިފައި ހުރުމާއި، ވިޔަފާރީގެ ދާއިރާގައި ތަޖުރިބާ ލިބިފައިވާ ފަރާތަކަށްވުމުގެ އިތުރުން އެހެން މީހުންނާއެކު ގުޅިގެން މަސައްކަތްކުރުމުގެ ގާބިލުކަން ހުރި ފަރާތަކަށް ވާންޖެހޭނެ ކަމަށްވެސް އެ ބޭންކުން ބުނެއެވެ.
މި މަގާމަށް މިއަދުން ފެށިގެން ފެބްރުއަރީ 24 ވަނަ ދުވަހުގެ 14:00 ގެ ނިޔަލަށް ކުރިމަތިލެވޭނެއެވެ.
