މާލޭގައި ހުންނަ ފްރުޓް ޓްރީ އެޕަލް ނަމަކަށް ކިޔާ ފިހާރައެއްގެ ގުދަނުގައި ރޯވެ ބޮޑެތި ގެއްލުންތަކެއް ވެފައިވާއިރު މި ހާދިސާގައި އްލުންވި 22 ފަރާތަކަށް ވަގުތީ ބޯހިޔާވަހިކަން ދީފައިވާކަމަށް ނޭޝަނަލް ޑިޒާސްޓާ މެނޭޖްމެންޓު އޮތޯރިޓީ (އެންޑީއެމްއޭ) އިން ބުނެފިއެވެ.
އެންޑީއެމްއޭ އިން ބުނީ މި ހާދިސާ އާއި ގުޅިގެން އެ އޮތޯރިތީގެ ޓީމުން އެ ސަރަހައްދުގައި ހަރަކާތްތެރިވެ އިންސާނީ އެހީ ފޯރުކޮށްދެންޖެ ގޭބީސީއެއް ހުރިތޯ ކަށަވަރު ކުރުމުގެ މަސައްކަތް ކުރަމުން ދާކަމަށާއި އެގޮތުން ވަގުތީ ބޯހިޔާވަހިކަން ބޭނުންވާ 10 ގޭބީސީއެއްގެ 33 ފަރާތެއް ފާހަގަކުރެވިފައިވާ ކަމަށެވެ.
އެއާއެކު އެންޑީއެމްއޭ އިން ބުނީ މިވަގުތު 5 ގޭބިސީއެއްގެ 14 ދިވެހިން އަދި 8 ބިދޭސީންނަށް ވަގުތީ ބޯހިޔާވަހިކަމާއި ކެއިންބުއިން ހަމަޖައްސައިދީފައިވާކަމަށާއި ބިދޭސީ 1 އާއިލާ އަމިއްލަ ވަގުތީ ބޯހިޔާވަހިކަމަށް ބަދަލުވެފައިވާ ކަމަށެވެ. އަދި 11 ބިދޭސީއަކަށް އެ މީހުން ނިސްބަތްވާ ކުންފުނި ތަކުން އެހީތެރިކަން ފޯރުކޮށްދީފައިވާކަމަށްވެސް އެންޑީއެމްއޭ އިން ވަނީ ބުނެފައެވެ.
މި ހާދިސާއާއި ގުޅޭ ގޮތުން މައުލޫމާތު ދެމުން އެމްއެންޑީއެފް އިން ބުނީ ފަޔާ އެންޑް ރެސްކިޔު ސާވިސްއަށް މި ހާދިސާގެ މައުލޫމާތު ރޭފަތިހު 04:20 ހާއިރު ލިބުމާ އެކު ފަޔާފައިޓަރުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ފަށާފައިވާކަމަށެވެ.
މިގޮތުން ފަޔާފައިޓަރުން ކުރި މަސައްކަތުން ރޯވެފައިހުރި އަލިފާން ކޮންޓްރޯލް ކުރެވުނީ ފަތިހު 05:27 ހާއިރުކަމަށް އެމްއެންޑީއެފް އިން ވަނީ ބުނެފައެވެ. އަދި އަލިފާންގަނޑު އެއްކޮށް ނިއްވާލާފައިވަނީ 06:00 ހާއިރުކަމަށް އެ މުއައްސަސާ އިން މައުލޫމާތު ދެއެވެ.
މި ހާދިސާގައި އެއްވެސް މީހަކަށް އަނިޔާވެފައި ނުވާއިރު އެމްއެންޑީއެފް އިން ބުނީ ރޯވި ގުދަން ބޭނުން ނުކުރެވޭ ވަރަށް އެއްކޮށް އަނދާފައި ވާކަމަށެވެ. އެހެން ނަމަވެސް އެ ގުދަނާ އިންވެގެން ހުރި ގެއިން މީހުން ހުސްކޮށްފައި ވާއިރު އެ ތަނަަށް ވެސް ވަނީ އަލިފާނުގެ އަސަރު ކޮށްފައެވެ.
