މޫސުމީ ބަދަލުތަކުގެ ސަބަބުން ދިމާވާ ގޮންޖެހުންތައް ރާއްޖެ ވަޑައިގެން ބެއްލެވުމަށް، އެމެރިކާގެ ރައީސް ޑޮނަލްޑް ޓްރަމްޕަށް ކުރީގެ ރައީސް މުހައްމަދު ނަޝީދު ދައުވަތު ދެއްވައިފި އެވެ.
އެމެރިކާގެ 47 ވަނަ ރައީސްގެ ގޮތުގައި، އެ ގައުމުގެ ވެރިކަމަށް ރޭ އެނބުރި ވަޑައިގެންނެވުމާ އެކު، ޓްރަމްޕް ވަނީ ގިނަ ނިންމެވުންތަކެއް ނިންމަވާފައެވެ. އޭގެ ތެރޭގައި ހިމެނޭ އެންމެ ވަރުގަދަ އެ ނިންމެވުމަކީ ޕެރިސް ކްލައިމެޓް އެއްބަސްވުމުން ވަކިވުމެވެ.
އެކަމާ ގުޅިގެން ނަޝީދު އިސްވެ ހުންނަވައި އުފެއްދެވި ކްލައިމެޓް ވަލްނަރަބަލް ފޯރަމުގެ ސެކްރެޓަރީ ޖެނެރަލުގެ ހައިސިއްޔަތުން ރޭ ނަޝީދު ވަނީ ބަޔާނެއް ނެރުއްވާފައެވެ. އެ ބަޔާނުގައި އެމެރިކާގެ އާ ސަރުކާރާއެކު މަސައްކަތް ކުރަން ލިބޭ ފުރުސަތަށް ނަޝީދު މަރުހަބާ ދަންނަވާފައިވާއިރު ޕެރިސް އެގްރިމެންޓުން ވަކިވުމުން ނަޝީދު ވަނީ އެކަމާ ހިތާމަ ފާޅު ކުރައްވާފައެވެ.
އަދި މޫސުމީ ނުރައްކާތަކުން އެންމެ ނާޒުކު ގައުމުތަކުގެ މުސްތަގުބަލު ނެތެމުން ދާއިރު، މިއީ އެމެރިކާ ފަދަ ބޮޑެތި ގައުމުތަކުން އިސް ނަގައި، ހާލަތު ބަދަލު ކުރުމަށް ނަމޫނާ ދައްކަންވީ ވަގުތު ކަމަށް ވެސް އެމަނިކުފާނު ވިދާޅުވިއެވެ. އަދި ތިމާވެށީގެ ގޮތުން ރާއްޖެފަދަ ކުދި ގައުމުތަކަށް ކުރިމަތިވެފައިވާ ގޮންޖެހުންތައް ގާތުން ބައްލަވައިލެއްވުމަށް ނަޝީދު ވަނީ ޓްރަމްޕަށް ދައުވަތު ދެއްވާފައެވެ.
"އެ މަނިކުފާނުގެ ވެރިކަމުގެ މި ނިންމެވުމާ މެދު ދެވަނަ ވިސްނެވުމަކަށް ވަޑައިގަތުމަށްޓަކައި، އަޅުގަނޑު ރައީސް ޓްރަމްޕަށް ދައުވަތު އަރުވަން، އުދައެރުމުން ފެށިގެން، ހޫނުގަދަވުމާއި ގްލޭސިއާސްތައް ވިރުމާއި ދަނޑުބިންތައް ފަނާވެ ގޮސްފައިވާ މަންޒަރުތައް ގާތުން ބައްލަވައިލެއްވުމަށް." ނަޝީދުގެ ބަޔާނުގައި ވެއެވެ.
އަދި ހަމައެެހެންމެ މޫސުމީ ކާރިސާތަކާ ދެކޮޅަށް ކުރާ މަސައްކަތުގައި ހުރިހާ ގައުމުތަކެއް ގުޅިގެން އެއް އަމާޒަކަށް މަސައްކަތް ކުރަންޖެހޭކަން ފާހަގަ ކުރައްވާ ނަޝީދު ވަނީ އެމެރިކާ އިން ޕެރިސް އެގްރިމެންޓަށް އަލުން ބައިވެރިވާނެ ކަމުގެ އުންމީދު އެބައޮތް ކަމަށް ވިދާޅުވެފައެވެ.
ޓްރަމްޕްގެ ވެރިކަމުގެ ފުރަތަމަ ދައުރުގައި ވެސް ޕެރިސް އެގްރިމެންޓުން އެމެރިކާ ވަކިވާން ނިންމާފައިވެއެވެ. ނަމަވެސް ޖޯ ބައިޑަންގެ ރައީސް ކަމުގެ ފުރަތަމަ ދުވަހު ޓްރަމްޕްގެ އެ ނިންމުން ވަނީ ބަދަލުކުރައްވާފަ އެވެ. ޕެރިސް އެއްބަސްވުމަކީ ގާނޫނީ ގޮތުން އަމަލު ކުރުން ލާޒިމްކުރާ މުއާހަދާ އެއް ނޫން ނަމަވެސް، މިއީ ދުނިޔޭގެ ފިނިހޫނު މިން މައްޗަށް ދިއުން ކޮންޓްރޯލު ކުރުމަށް، ޖައްވަށް ބޭރުވާ ދުނިޔެ ހޫނު ކުރާ ގޭސްތައް މަދުކުރުމަށް ދުނިޔޭގެ އެއްބާރުލުން އިތުރުކުރުމަށް މަގުދައްކައިދޭ އެއްބަސްވުމެކެވެ.
ޕެރިސް އެގްރިމެންޓުގައި 196 ގައުމަކުން ސޮއިކުރިއިރު، ގައުމުތަކުން އެއްބަސްވީ ދުނިޔޭގެ ހޫނުމިން މަތިވިޔަނުދީ ހިފެހެއްޓުމަށާއި މޫސުމީ ބަދަލުތަކުން ލިބޭ ގެއްލުން ކުޑަ ކުރަން މަސައްކަތް ކުރުމަށާއި މޫސުމީ ބަދަލުތަކުން ލިބޭ ގެއްލުން ފޫބެއްދުމަށް މާލީ އެހީ ހޯދުމަށެވެ. ނަޝީދަކީ މޫސުމަށް އަންނަ ބަދަލުތަކާ ދެކޮޅަށް މީގެކުރިން ބޭރު ގައުމުތަކުގައި އެންމެ ބޮޑަށް ވަކާލާތު ކުރެއްވި އެއް ލީޑަރުކަން ފާހަގަކޮށްލެވެއެވެ.
