ދިވެހި ރުފިޔާގެ އާ ނިޝާނާއެކު ޗާޕުކުރި 100 ރުފިޔާގެ ނޫޓު ބޭނުން ކުރަން ފަށައިފިއެވެ.
"ރަން ދިހަ ފަހެއް" ނޫޓު ސީރިސްގައި ހިމެނޭ 100 ރުފިޔާގެ ނޫޓު ޗާޕު ކުރީ ސްޓޮކް މަދުވުމުންނެވެ. މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނީ، އަލަށް ޗާޕުކޮށްގެން ނެރޭ 100 ރުފިޔާގެ ނޫޓުގެ ދެފުށުގައި ދިވެހި ރުފިޔާގެ އާ ނިޝާން ހިމަނާފައިވާ ކަމަށެވެ.
އެގޮތުން ދިވެހި ރުފިޔާގެ އާ ނިޝާން ހިމަނާފައި ވާނީ ނޫޓުގެ މޫނުމަތީގެ ވައާތް ފަރާތުން މަތީގައިވާ، މޫނުމަތީ އަގާއެކު އަދި ނޫޓުގެ ފަހަތުގެ ކަނާއަތް ފަރާތުން މަތީގައިވާ މޫނު މަތީ އަގާއެކުއެވެ. މި ނޫޓުގައި ސޮއި ކުރައްވާފައި ވަނީ މޯލްޑިވްސް މަނިޓަރީ އޮތޯރިޓީގެ ކުރީގެ ގަވަރުނަރު އަލީ ހާޝިމްއެވެ.
މި ނޫޓް ޗާޕްކޮށްފައި ވަނީ މިދިޔަ ޖުލައި މަހުގެ 7 ވަނަ ދުވަހުއެވެ. އަދި އެ ތާރީހް ނޫޓުގެ ތިރީ ކައިރި ފަށުގައި ޖަހާފައިވާނެ ކަމަށާއި މިލާދީ އަދި ހިޖުރީ ތާރީހު މުހައްރަމް 1، 1446 ވެސް އެ ނޫޓުން ފެންނާނެއެވެ. 100 ރުފިޔާގެ އާ ނޫޓު ތައާރަފް ކުރާ އިރު، ކުރީގެ 100 ރުފިޔާގެ ނޫޓު ވެސް ދައުރު ކުރަމުން ދާނެ ކަމަށް އެމްއެމްއޭ އިން ބުނެއެވެ.
މިއީ އާންމު އުސޫލުން އެމްއެމްއޭ އިން ދައުރުވާ ނޫޓު މަދުވުމުން ކުރަމުން އަންނަ ކަމެކެވެ. އެންމެ ފަހުން ސްޓޮކް މަދުވެގެން 100 ރުފިޔާގެ ނޫޓު ބާޒާރަށް ނެރުނީ ސެޕްޓެމްބަރު 2018، ގަ އެވެ. ރަން ދިހަ ފަހެއްގެ ނޫޓު ސީރީޒްގައި މިހާރު ހިމެނެނީ 5، 10، 20، 50، 100، 500 އަދި 1،000 ރުފިޔާގެ ނޫޓުތަކެވެ.
