ޕްރައިމަރީ ހެލްތްކެއާގެ ހިދުމަތް ހަރުދަނާ ކުރުމަށް 6 އަތޮޅެއްގައި ޓްރެއިނިން ކުރިއަށް ގެންގޮސްފިއެވެ.
ހެލްތް މިނިސްޓްރީ އިން ބުނީ މުޅި ރާއްޖޭގައި ޕްރައިމަރީ ހެލްތް ކެއާގެ ހިދުމަތް ހަރުދަނާ ކުރުމުގެ ގޮތުން މިހާތަނަށް 6 އަތޮޅެއްގައި ޕްރައިމަރީ ހެލްތް ކެއާ ޓްރެއިނިން ކުރިއަށް ގެންގޮސްފައިވާ ކަމަަށާއި، އެއީ ރ، ބ، ފ، ދ، ގދ އަދި ޏ އަތޮޅު ކަމަށެވެ.
ފެންވަރު ރަނގަޅު ޕްރައިމަރީ ހެލްތްކެއާއެއް ދިނުމަށް މާލޭގައި 6 އަވަށަކާއި އަތޮޅު ތެރޭގައި ސެންޓަރުތައް ގާއިމުކުރަން ރައީސް ޑރ. މުހައްމަދު މުއިއްޒު ވަނީ ނިންމަވާފައެވެ. މި ސިސްޓަމުގެ ތެރެއިން ސިއްހީ ހިދުމަތުގެ އިސްރާފުތައް ކުޑަކުރެވިގެން ދާނެގޮތަކަށް މި މަސައްކަތް ކުރިއަށް ގެންދިއުމަށް ރައީސް ނިންމަވާފައިވާ ކަމަށް ރައީސްއޮފީހުން ވަނީ ބުނެފައެވެ.
ރައީސްއޮފީހުން ވަނީ މި ހިދުމަތްތައް ފޯރުކޮށްދިނުުގައި މާލެ ސަރަހައްދާއި ރީޖަނަލް ސިޓީތަކުގައި ސެންޓަރުތައް ގާއިމުކުރުމަށް ބޭނުންވާ ޖާގަ ހަމަޖެއްސުމުން އަދި ސެންޓަރުތައް ގާއިމުކުރުމުން ރައްޔިތުން ކިއުގައި މަޑުކުރަން ޖެހޭ ވަގުތު މަދުވެގެން ދާނޭ ކަމަށާއި މިހާރަށް ވުރެ ފަސޭހައިން ސްޕެޝަލިސްޓުންނާވެސް ކޮންސަލްޓު ކުރެވިގެން ދާނެކަމަށް ބުނެފައެވެ.
ފާހަގަކޮށްލެވޭ ގޮތުުގައި ސަރުކާރުން ދަނީ ސިއްހީ ދާއިރާ ތަރައްގީ ކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން މިދިޔަ އަހަރުގެ ފަހު ކޮޅު ދަރުމަވަންތަ ހޮސްޕިޓަލް ޓާޝަރީ ފެންވަރަށް ހިދުމަތްދޭ ހޮސްޕިޓަލެއްގެ ގޮތުގައި އަދި ހުޅުމާލެ ހޮސްޕިޓަލުގައި އަލަށް ތާރަފްކުރި ހިދުމަތްތަކާއެކު ޓާޝަރީ ފެންވަރަށް ހިދުމަތްދޭ ހޮސްޕިޓަލެއްގެ ގޮތުގައި ރައީސް ވަނީ ހުޅުއްވައިދެއްވާފައެވެ.
