ތެލެސީމިއާ ކުދިންގެ ތެރެއިން މިދިޔަ އަހަރު ބޯން މެރޯ ހެދުމަށް ފޮނުވި 14 ކުދިންގެ ތެރެއިން 6 ކުއްޖަކު ބޯން މެރޯ ހެދުމަށްފަހު ރާއްޖެ އައިސްފިއެވެ.
ހެލްތް މިނިސްޓްރީން ބުނާ ގޮތުގައި، މިދިޔަ އަހަރުގެ އެކި ދުވަސްވަރުގެ މަތިން 14 ކުއްޖަކު ބޯން މެރޯ ހެދުމަށް ރާއްޖެއިން ބޭރަށް ފޮނުވާފައި ވާއިރު، މިވަގުތު ރާއްޖެއިން ބޭރުގައި 7 ކުއްޖަކު އެބަތިއްބެއެވެ. ފަރުވާ ފުރިހަމަ ކުރުމަށް ފަހު އޭގެތެރެއިން 3 ކުއްޖަކު އަންނަ މަހުތެރޭގައި ރާއްޖެއަށް އަންނާނެ ކަމަށާއި ބަކީ ތިބި 4 ކުދިންގެ ފަރުވާ ކުރިއަށް ދާކަމަށް ހެލްތް މިނިސްޓްރީން ބުނެއެވެ.
ބޯންމެރޯ ހެދުމަށް މިިދިޔަ އަހަރު ފޮނުވި 14 ކުދިންގެ ތެރެއިން 6 ކުއްޖަކު ފަރުވާއަށް ފަހު ރާއްޖެއަށް އައިސްފައިވާ އިރު 1 ކުއްޖަކު ވަނީ މަރުވެފައެވެ.
މިދިޔަ އަހަރުތެރޭ ބޯންމެރޯ ހެދުމަށް 14 ކުދިން ފޮނުވާފައިވާ އިރު، މިއަހަރު ތެރޭ ބޯން މެރީ ހެދުމަށް ފޮނުވާ 10 ކުދިން ކަނޑައެޅުމުގެ މަސައްކަތް މިހާރު އަންނަނީ ކުރަމުންނެވެ. ޒަކާތު ފަންޑުގެ އެހީގައި ކޮންމެ އަހަރަކު 10 ކުދިން، ބޯންމެރޯ ހެދުމަށް ފޮނުވުމަށް ސަރުކާރުން ވަނީ ނިންމަވާފައެވެ.
މިއަހަރު ފޮނުވާ 10 ކުދިން ކަނޑައެޅުމުގެ މަސައްކަތްތުގެ ތެރެއިން ފުރަތަމަ 5 ކުދިން ވަނީ ބޯންމެރޯ ސްޕެޝަލިސްޓް ރިވިއު ކުރުމަށް ފަހު ބޯންމެރޯގެ ކުރިއަށް ވާންޖެހޭ ތައްޔާރީތައް ވާން ފަށާފައި ކަމަށް ހެލްތް މިނިސްޓްރީން ބުނެއެވެ. އަދި މިހާތަނަށް ބޯން މެރޯ ހުދެމުގެ ލިސްޓުގައި މިވަގުތު 22 ކުދިން އެބަތިބި ކަމަށް އެ މިނިސްޓްރީން ބުނެއެވެ.
ސަރުކާރުން ތެލެސީމިއާ މައްސަލައަށް ދޭ ހާއްސަ އިސްކަމުގެ ތެރެއިން ބޯޏްމެރޯ ޓްރާންސްޕްލާންޓް ހެދުމުގެ އިތުރުން ތެެލެސީމިއާ ކުދިންނަށް ހާއްސަ ހޮސްޕިޓަލެއް އެޅުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅުތަކުގެ ތެރެއިން ހިމެނޭ ކަންތައްތަކެވެ. ތެލެސީމިއާ ކުދިންނަށް ހާއްސަ ހޮސްޕިޓަލެއް އަޅަން ހުޅުމާލެއިން 72،000 އަކަފޫޓުގެ ބިން ހަމަޖެހިފައިވާއިރު އެ ހޮސްޕިޓަލް އިމާރާތް އެޅުމުގެ އަމަލީ މަސައްކަތް ލަސްތަކެއް ނުވެ ފެށިގެންދާނެ ކަމަށް ސަރުކާރުން ވަނީ މީގެ ކުރިން އިއުލާން ކޮށްފައެވެ. މީގެ އިތުރުން ތެލެސީމިއާ ރާއްޖެއިން ނައްތާލުމަށް 10 އަހަރުގެ މާސްޓާ ޕްލޭންއެއް ތައްޔާރުކުރުމުގެ މަސައްކަތް ފަށާފައިވާއިރު ރާއްޖެއިން ތެލެސީމިއާ ބަލި ނައްތާލުން ނުވަތަ މިހާރަށްވުރެ ބޮޑު ތަނުން ކުޑަ ކުރުމަކީ ސަރުކާރުގެ އަމާޒެވެ.
