ޕީއެންސީ އަށް މެންބަރުން އިތުރު ކުރަން ވަގު ފޯމްތަކެއް ހުށަހެޅި ކަމަށް ބުނާ މައްސަލަ އިދިކޮޅު މައި ޕާޓީ، އެމްޑީޕީން އެންޓި ކޮރަޕްޝަން ކޮމިޝަން (އޭސީސީ) އަށާއި ޕްރޮސިކިއުޓާ ޖެނެރަލްގެ އޮފީސް (ޕީޖީ)އަށް ހުށަހަޅައިފިއެވެ.
އޮޅުވާލައިގެން އާންމުން އެކި ސިޔާސީ ޕާޓީތަކަށް ވެއްދުމާއި، ރަޖިސްޓްރީވެފައިވާ ޕާޓީ ނޫން އެހެން ޕާޓީއެއްގައި ނަން އޮންނަ މައްސަލައަކީ މީގެ ކުރިންވެސް ދިމާވެފައިވާ މައްސަލަތަކެވެ.
ނަމަވެސް ފަހުން މި މައްސަލަ ބޮޑުވެފައި ވަނީ ޕީއެންސީން ހިންގި 'މެންބަޝިޕް ޑްރައިވް 'ގައި ވަގު ފޯމު ފުރައިގެން އެ ޕާޓީއަށް މީހުން ވެއްދި ކަމަށް ބުނާ މައްސަލައެކެވެ.
ޕީއެންސީއަށް ވަގަށް ވެއްދި މީހުންގެ ތެރޭގައި ރައްޔިތުންގެ މަޖިލީހުގެ ވައިކަރަދޫ ދާއިރާގެ އެމްޑީޕީ މެންބަރު ހުސެއިން ޒިޔާދު އާއި އެމްޑީޕީގެ ގައުމީ މަޖިލީހުގެ މެންބަރަކާއި އާންމު ގިނަ މެންބަރުން ހިމެނެ އެވެ. މި މައްސަލައާ ގުޅިގެން ހުރި ކަންބޮޑުވުންތައް އިދިކޮޅު އެމްޑީޕީން މިދިޔަ ހަފުތާގައި އިލެކްޝަންސް ކޮމިޝަނާ ވެސް ހިއްސާކޮށްފައިވާއިރު މިއަދު އެ މައްސަލަ ވަނީ ފުލުހުންގެ އިދާރާގެ އިތުރުން އެންޓި ކޮރަޕްޝަން ކޮމިޝަނަށްވެސް މައްސަލަ ހުށަހަޅާފައެވެ.
އެގޮތުން އެމްޑީޕީން އެކްސްގައި ކުރި ޕޯސްޓެއްގައި ބުނީ ރައްޔިތުންގެ ޒާތީ މައުލޫމާތުން ވައްކަންކޮށް، ވަގު ފޯމު ފުރައިގެން ސަރުކާރު ހިންގާ ޕީއެންސީއަށް ވެއްދި މައްސަލާގައި ހިމެނޭ ޖިނާއީ ކުށްތައް ތަހުގީގު ކުރުމަށް ފުލުހުންނާއި އޭސީސީއަށް އެ ޕާޓީން ހުށަހަޅާފައިވާ ކަމަށެވެ. އަދި އެ މައްސަލަތައް ތަހުގީގު ކުރުމަށް އެ ދެ އިދާރާގެ މައްޗަށް އަމުރުކޮށްދެއްވުމަށް އެދި ޕީޖީގައި ވެސް އެދިފައި ވާނެ ކަމަށް އެ ޕާޓީން ބުނެއެވެ.
މީގެ އިތުރުން ޕީއެންސީން ހުށަހެޅި އެއްވެސް ފޯމެއް ޕްރޮސެސް ނުކުރުމަށާއި، ޕްރޮސެސް ކުރި ފޯމުތައް ކެންސަލްކޮށް، އެ ފޯމުތަކުގެ ސައްހަކަން އަލުން ކަށަވަރުކުރުމަށް އެދި އިލެކްޝަންސް ކޮމިޝަން (އީސީ)އަށް ވެސް ސިޓީއެއް ފޮނުވާފައި ވާނެ ކަމަށް އެމްޑީޕީން ވަނީ ބުނެފައެވެ.
މި މައްސަލަ ފެންމަތިވެފައިވާއިރު ދާދިފަހުން ވަނީ ޕީއެންސީގެ ފޯމުތައް ކަމަށް ބެލެވޭ ފޯމުތަކެއް ހޯމް މިނިސްޓްރީ އާއި ޑީއެންއާރުގެ މުވައްޒަފުން ފުރަން ތިބި މަންޒަރު ދައްކުވާދޭ ފޮޓޯ ތަކެއްވެސް އާންމުވެފައެވެ. އަދި މި މަސައްކަތް ކުރިއަށްދާގޮތް ބަލަން ހޯމް މިނިސްޓަރު އަލީ އިހުސާނު ހުންނަ ފޮޓޯއެއް ވެސް އާންމުވެފައިވާއިރު އިދިކޮޅުން ގެންދަނީ މިނިސްޓަރު އިހުސާން މަގާމުން ދުރުކުރުމަށް އެދި އަޑުއުފުލަމުންނެވެ.
ނަމަވެސް މި މައްސަލައާއި ގުޅިގެން މިހާތަނަށް ސަރުކާރުން ބަހެއް ބުނެފައި ނުވެއެވެ.
