ބައިނަލްއަގުވާމީ މައިދާނުގައި ރާއްޖެއިން ގެންގުޅޭ ސިޔާސަތު ބަދަލެއް ނުވާކަމަށާއި، އދ ގައި ރާއްޖެއިން ވޯޓު ދެމުންދާގޮތަށް ބަލާލުމުން އެކަން ސާފުވެގެންދާނެ ކަމަށް ފޮރިން މިނިސްޓަރު ޑރ. އަބްދުﷲ ހަލީލް ވިދާޅުވެއްޖެއެވެ.
މިނިސްޓަރު ހަލީލް މިފަދައިން ވިދާޅުވެފައިވަނީ އެސްޓޯނިއާގެ ގާނޫނު ހަދާ މަޖިލީހުން ދިވެހިރާއްޖެއިން ޔޫކްރެއިނަށް ތާއީދުކުރާކަމަށާއި، އެކަމަށް ރާއްޖެއަށް ޝުކުރު އަދާކުރާކަމަށް ބުނެ އެ ގައުމުން ކުރި ޕޯސްޓަކާއި ގުޅިގެންނެވެ.
2022 ވަނަ އަހަރުގެ ފެބްރުއަރީ މަހު ރަޝިއާއިން ހަމަލާދޭން ފެށުމާއި ގުޅިގެން ފެށުނު ރަޝިޔާ ޔޫކްރެއިން ހަނގުރާމައިގައި ދިވެހިރާއްޖެއިން މިހާތަނަށް ވަކި ކޮޅެއް ނަގާފައެއް ނުވެއެވެ. ނަމަވެސް އެސްޓޯނިއާގެ ގާނޫނު ހަދާ މަޖިލީހުން ކުރި ޕޯސްޓުގައި ރާއްޖޭގެ ތާއީދު ޔޫކްރެއިންއަށް އޮތް ކަން ހާމަވުމާއެކު ގިނަ ބަޔަކު ވަނީ ސޯޝަލް މީޑިއާގައި ފާޑުކިޔާފައެވެ.
މިކަމާ ގުޅިގެން މިނިސްޓަރު ހަލީލު ވިދާޅުވީ ކުދި ގައުމުތަކުގެ މިނިވަންކަމާއި ސިޔާދަތާއި އިސްތިގުލާލަށް ބުރޫއަރާ ފަދަ ހާލަތްތަކުގައި ރާއްޖެއިން އަބަދުވެސް ނަގަނީ ޕްރިންސިޕަލް ސްޓޭންޑެއް ކަމަށާއި، ބައިނަލްއަގުވާމީ މައިދާނުގައި ރާއްޖެއިން ގެންގުޅޭ ސިޔާސަތު ބަދަލު ނުވާކަމަށެވެ.
ހަލީލް ވިދާޅުވީ ރާއްޖޭގެ ހާރިޖީ ސިޔާސަތު ބިނާވެގެން ވަނީ އެއްވެސް ގައުމަކާ ހަތުރުވެރި ނުވެ، ދިވެހި ރައްޔިތުންނަށް ލާބަ އާއި މަންފާ ލިބޭ ގޮތަށް ކަމަށާއި، ހުރިހާ ގައުމަކާ އެކީ ވެސް ގާތް ގުޅުން ބޭއްވުމުގު މައްޗަށް ކަމަށެވެ.
ފާހަގަކޮށްލެވޭ ގޮތުގައި ރަޝިޔާއަކީ ދިވެހިރާއްޖޭގެ ޓޫރިޒަމްގެ މުހިންމު މާކެޓެކެވެ. މިއަހަރުގެ މިހާތަނަށް އެންމެ ގިނަ ފަތުރުވެރިން ރާއްޖެ އައިސްފައިވަނީ ރަޝިޔާއިން ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ހާމަވެއެވެ. އެގޮތުން މި އަހަރުގެ ޖެނުއަރީ 14ގެ ނިޔަލަށް ރަޝިޔާގެ 12،920 ފަތުރުވެރިން ވަނީ ރާއްޖެ އައިސްފައެވެ.
