އަނެއްކާވެސް ރާއްޖޭގެ ބޮޑު ބަޔަކަށް މޫސުން ގޯސްވާނެކަމަށް މޫސުމާބެހޭ ގައުމީ އިދާރާ (މެޓް އޮފީހުން) ލަފާކުރުމާއި ގުޅިގެން އެކަމަށް ތައްޔާރުވުމުގެ ގޮތުން އެމްއެންޑީއެފް އިން ކުރިއާލާ ވެލިބަސްތާ ޖެހުމުގެ މަސައްކަތް ފަށައިފިއެވެ.
އެމްއެންޑީއެފް އިން ބުނީ ކުރިއަށް އޮތް ދުވަސްތަކުގައި މާލެއަށް ވިއްސާރަ ކުރާނެކަމަށް ލަފާކޮށްފައި ވާތީ، ރައްޔިތުންނަށް އެހީތެރިކަން ފޯރުކޮށްދިނުމުގެ ގޮތުން ރޭގެ ދަންވަރު 2:26 އާ ހަމައަށް 63 ގޭބީސީއެއްގައި 533 ވެލިބަސްތާ ޖަހައިދީފައިވާ ކަމަށެވެ.
އެމްއެންޑީއެފް އިން ވަނީ ރާއްޖެއަށް މޫސުން ގޯސްވާނެ ކަމަށް ލަފާކޮށްފައި ވާތީ، ލިބިދާނެ ގެއްލުންތަކުން ރައްކާތެރިވުމަށް ޖޮއިންޓް އޮޕަރޭޝަނެއްވެސް ފަށާ މި މަސައްކަތުގެ ދަށުން ޖޮއިންޓް އޮޕަރޭޝަން ސެންޓަރެއް ގާއިމުކޮށްފައެވެ.
ރާއްޖޭގެ އިރުން ހުޅަނގުދެކުނު ބޭ އޮފް ބެންގާލްގައި ކޮޅިގަނޑެއް އުފެދި، އެ ކޮޅިގަނޑު ހުޅަނގަށް ޖެހި ރާއްޖޭގެ ސަރަހައްދުގައި ބޯ ވިއްސާރަ ވިލާ އުފެދުމުގެ ފުރުސަތު ބޮޑުވާނެ ކަމަށް މެޓް އޮފީހުން ވަނީ ބުނެފައެވެ.
އެހެން ކަމުން 13 ޖެނުއަރީ 2025 އިން ފެށިގެން 18 ޖެނުއަރީ 2025 އާ ހަމައަށް ރާއްޖޭގެ ބޮޑު ސަރަހައްދަކަށް ގުގުރުމާއެކު ބޯކޮށް ވާރޭ ވެހޭނެ ކަމަށް މެޓުން ވަނީ ލަފާކޮށްފައެވެ.
ގަދަވަޔާއެކު ކަނޑުތައް ގަދަވެ، ބޯކޮށް ވާރޭވެހޭނެ ކަމަށް ލަފާކުރެވޭތީ މެޓް އޮފީހުން ވަނީ ހުރިހާ ފަރާތްތަކުން މޫސުމަށް ސަމާލުވުމަށް އިލްތިމާސް ކޮށްފައެވެ. އަދި ކަނޑުދަތުރުކުރާ ފަރާތްތަކުން، ދަތުރުތަކަށް ފެއްޓުމުގެ ކުރިން އެންމެ ފަހުގެ މޫސުމީ މައުލޫމާތު ހޯދުމަށް ވެސް މެޓް އޮފީހުން އިލްތިމާސްކޮށްފައިވެއެވެ.
