ރީޖަނަލް އެއާޕޯޓް ކޮމްޕެނީ ލިމިޓެޑް (އާރްސީއެލް) ގެ ބޯޑް މީޓީންގައި ތާސް ކުޅޭނީ ކަމަށް ބުނެ ސޯޝަލް މީޑިއާގައި ހަސަން ކުރުސީގެ އެކައުންޓުން ފާޑުކިޔުމުން އެ ކުންފުނީގެ ޑިރެކްޓަރު ހުސައިން ޝަރީފް ރައްދު ދެއްވައިފިއެވެ.
ހަސަން ކުރުސީ އެކްސްގައި ކުރި ޕޯސްޓްގައި ހިއްސާކޮށްފައިވާ ފޮތޯތަކުން ފެންނަނީ އެ ކުންފުނީގެ އިސް މަގާމުތަކުގައި ތިއްބެވި ބޭފުޅުން ތާސްކުޅެން ތިބޭ މަންޒަރެވެ. އެ ޕޯސްޓް ކުރި ފަރާތުން ބުނެފައި ވަނީ، މިއީ ބޯޑް މީޓީން ކުރިއަށްދާ ގޮތް ކަމަށާއި އެ ބޭފުޅުން ވަރަށް ބުރަކޮށް މަސައްކަތް ކުރަމުން އަންނަ ކަަމަށެވެ. ހުރިހާ ބޯޑް ޕްރޮޕޯސަލްތައް އަންނަނީ ކުދިކުދި ކާޑްތަކެއްގެ ސިފައިގައި ކަމަށާއި ބޯޑް މެންބަރުން ކާޑުތައް ކިޔަން ތިބި މަންޒަރު ފެންނަ ކަމަށާއި އަދި ފަހަރަކު ކާޑެއް ކިޔުމަށް ފަހު ވޯޓު ދެނީ ކަމަށް ބުނެފައި ވެއެވެ.
މި ޕޯސްޓަށް ރައްދު ދެއްވައި ހުސައިން ޝަރީފް ވިދާޅުވީ، މިއީ އެ ކުންފުނިޣެ އަހަރީ ދުވަސް ފާހަގަ ކުރުމަށް ބޭއްވި ހަރަކާތުގެ ތެރެއިން ޑިގު މުބާރާތެއް ކަމަށެވެ.
އެ ކުންފުނީގެ އަހަރީ ދުވަސް ފާހަގަކުރުމުގެ ގޮތުން، ކުންފުނީގެ ހެޑް އޮފީހާއި ރީޖަނަލް އެއާޕޯޓްސްތަކުގައި ވަނީ އެކި ހަރަކާތްތައް ހިންގާފައެވެ. އެގޮތުން މިއަދު އެކުންފުނީގައި ބޭއްވި ކުޑަ ހަފުލާއެއްގައި، އެ ކުންފުނީގެ މެނޭޖިން ޑިރެކްޓަރު އަހްމަދު މުބީން ވަނީ ކުންފުނީގެ އެންމެހާ މުވައްޒަފުންނަށާއި ފާއިތުވެ ދިޔަ ހަތަރު އަހަރު ދުވަހު އެ ކުންފުނީގެ އެއާޕޯޓްތަކުން ހިދުމަތް ހޯދި އެންމެހާ ފަސިންޖަރުންނަށް ދުވަހުގެ ހެޔޮ އެދުމާއި ތަހުނިޔާ އަރިސްކޮށްފައެވެ.
އާރްއޭސީއެލް އަކީ ޖެނުއަރީ 11، 2021 ގައި ރައީސުލްޖުމްހޫރިއްޔާގެ ގަރާރަކުން އުފައްދާފައިވާ 100 ޕަސެންޓް ސަރުކާރު ހިއްސާވާ ކުންފުންޏެކެވެ. މި ކުންފުނި އުފައްދުމުގެ މައިގަނޑުއެއް މަގްސަދަކީ ސަރުކާރުން ހިންގާ އެއާޕޯޓުތަކުން ރައްޔިތުންނަށް ދޭ ހިދުމަތްތަކުގެ ފެންވަރު ރަނގަޅު ކުރުމާއި، އެއާޕޯޓުތަށް ހިންގުމުގައި ސަރުކާރުގެ ބަޖެޓަށް ބަރޯސާވާ މިންވަރު ދަށްކުރުމެވެ. މީގެއިތުރުން، ސަރުކާރުން ތަރައްގީ ކުރާ އެންމެހާ އެއާޕޯޓްތައް ހިންގައި ބެލެހެއްޓުމާއި، އިތުރަށް ތަރައްގީ ކުރުމަށެވެ.
އާރްއޭސީއެލް އަށް ހަތަރު އަހަރު ފުރިފައިވާ އިރު އެ ކުންފުނީގެ ދަށުން މިހާރު ރާއްޖޭގައި އަންނަނީ އަށް ޑޮމެސްޓިކް އެއާޕޯޓް ހިންގަމުންނެވެ. އެގޮތުން މިހާރު އޮޕަރޭޓް ކުރަމުން އަންނަ އެއާޕޯޓްތަކުގެ ތެރޭގައި ހޯރަފުށި އެއާޕޯޓް، ހަނިމާދޫ އިންޓަނޭޝަނަލް އެއާޕޯޓް، ކުޅުދުއްފުށި އެއާޕޯޓް، ފުނަދޫ އެއާޕޯޓް، މާވަރުލު އެއާޕޯޓް، ފަރެސްމާތޮޑާ އެއާޕޯޓް، ފުވައްމުލަކު އެއާޕޯޓް އަދި ކައްދޫ އެއާޕޯޓް ހިމެނެއެވެ.
