ދިވެހި ފައިސާގެ ނިޝާނަކަށް ތާނައިގެ "ރ" ގައި އިތުރު ރޮނގުބުރިއެއް ހިމެނޭހެން ތައާރަފް ކުރި ނިޝާނާ އެކު ޗާޕްކުރާ 100 ރުފިޔާގެ އާ ނޫޓު މި މަހުގެ 19 ވަނަ ދުވަހު ތައާރަފްކުރަން ނިންމާފައިވާ ކަމަށް އެމްއެމްއޭ އިން ބުނެފިއެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނީ، އަލަށް ޗާޕުކޮށްގެން ނެރޭ 100 ރުފިޔާގެ ނޫޓުގެ ދެފުށުގައި ދިވެހި ރުފިޔާގެ އާ ނިޝާން ހިމަނާފައިވާ ކަމަށެވެ. ދިވެހި ރުފިޔާގެ އާ ނިޝާން ހިމަނާފައި ވާނީ ނޫޓުގެ މޫނުމަތީގެ ވައާތް ފަރާތުން މަތީގައިވާ، މޫނުމަތީ އަގާއެކު އަދި ނޫޓުގެ ފަހަތުގެ ކަނާއަތް ފަރާތުން މަތީގައިވާ މޫނު މަތީ އަގާއެކު ކަމަށް އެމްއެމްއޭ އިން ބުނެއެވެ.
މި ނޫޓުގައި ސޮއި ކުރައްވާފައި ވަނީ މޯލްޑިވްސް މަނިޓަރީ އޮތޯރިޓީގެ ކުރީގެ ގަވަރުނަރު އަލީ ހާޝިމްއެވެ.
މި ނޫޓް ޗާޕްކޮށްފައި ވަނީ މިދިޔަ ޖުލައި މަހުގެ 7 ވަނަ ދުވަހުއެވެ. އަދި އެ ތާރީހް ނޫޓުގެ ތިރީ ކައިރި ފަށުގައި ޖަހާފައިވާނެ ކަމަށާއި މިލާދީ އަދި ހިޖުރީ ތާރީހު މުހައްރަމް 1، 1446 ވެސް އެ ނޫޓުން ފެންނާނެއެވެ. 100 ރުފިޔާގެ އާ ނޫޓު ތައާރަފް ކުރާ އިރު، ކުރީގެ 100 ރުފިޔާގެ ނޫޓު ވެސް ދައުރު ކުރަމުން ދާނެ ކަމަށް އެމްއެމްއޭ އިން ބުނެއެވެ.
މިހާރު ރާއްޖޭގައި ބޭނުން ކުރާ ކަރުދާސް ނޫޓަކީ ރާއްޖޭގެ މިނިވަން ކަމަށް 50 އަހަރު ފުރުމާ ދިމާކޮށް، 2016 ވަނަ އަހަރު ނެރުނު ރަން ދިހަ ފަހެއްގެ ނޫޓެވެ. އެ ކަރުދާހުގެ ގޮތުގައި 5، 10، 20، 50، 100، 500 އަދި 1،000 ރުފިޔާގެ ނޫޓު ވަނީ ނެރެފައެވެ.
ޖެނުއަރީ، 26، 2016 ގައި ބޭނުން ކުރަން ފެށި ރަންދިހަ ފަހެއް ނޫޓް ސީރީޒަށް، ރުފިޔާގެ އާ ނިޝާން ތައާރަފް ކުރި ފަހުން 50 ރުފިޔާގެ ނޫޓު ބަދަލުކޮށްފައި ވަނީ 2022 ގެ ފަހުކޮޅުގައެވެ. އެއަށްފަހު 100 ރުފިޔާގެ ނޫޓު ބަދަލުކޮށް ތައާރަފް ކުރަން މި ވަނީ ތައްޔާރުވެފައެވެ.
