މޯލްޑިވް ގޭސް ޕްރައިވެޓް ލިމިޓެޑުން އެލްޕީޖީ 45 ކިލޯގެ ސިލިންޑަރުތައް ރީފިލް ކޮށްދޭ އަގު 1170 ރުފިޔާއަށް ކުޑަކޮށްފިއެވެ.
މޯލްޑިވް ގޭހުން ބުނީ، އަގަށް ގެނައި ބަދަލާ އެކު ކަސްޓަމަރުންނަށް ވަރަށް ބޮޑު ހަރަދެއް ސަލާމަތްވާނެ ކަމަށެވެ. އަދި މިކަމުން ދައްކުވައިދެނީ ޒަރޫރީ ހަކަތައިގެ ހައްލުތައް މިހާރަށް ވުރެ އަގުހެޔޮކޮށް މުޖުތަމައަށް ފޯރުކޮށްދިނުމަށް ކުރާ މަސައްކަތް ކަމަށް އެ ކުންފުނިން ބުނެއެވެ.
ރާއްޖޭގައި އެލްޕީޖީ އުފެއްދުމުގައި އެންމެ އިސްކޮށް ހަރަކާތްތެރިވާ ފަރާތުގެ ހައިސިއްޔަތުން، ގޭބިސީތަކަށާއި، ވިޔަފާރިތަކަށާއި، ސިނާއަތްތަކަށް ވެސް، ފަސޭހައިން ލިބެން ހުރި އަދި ހަރަދު ކުޑަ ކައްކާ ގޭހަކީ މުހިއްމު ކަމެއް ކަމަށް މޯލްޑިވް ގޭހުން ބުނެއެވެ. މި ވަގުތު ގޭހުގެ އަގު ކުރުމާއެކު ކަސްޓަމަރުންގެ ހިތްހަމަޖެހުން އިތުރުކޮށް، ފެންވަރު ރަނގަޅު، އިތުބާރު ހިފޭ ހަކަތައިގެ ހައްލުތައް ފޯރުކޮށްދިނުމުގެ ޔަގީން ކަން ކަށަވަރުކޮށް ދެވޭ ކަމަށް އެ ކުންފުނިން ބުނެއެވެ.
މޯލްޑިވް ގޭހުން އަބަދުވެސް މަސައްކަތް ކުރަމުން ދަނީ ސަލާމަތާއި ފެންވަރު ރަނގަޅު އެންމެ މަތީ މިންގަނޑުތައް ދަމަހައްޓައި، މެދުކެނޑުމެއް ނެތި ގޭސް ސަޕްލައި ކޮށްދިނުމަށް ކަމަށް ވެސް އެ ކުންފުނިން ބުނެއެވެ. އަދި ކަސްޓަމަރުން ދޭ އިތުބާރާއި އެއްބާރުލުމަށް ޝުކުރު އަދާކުރާ ކަމަށާއި، ރާއްޖެއަށް ފުރިހަމަ ގޮތުގައި ހިދުމަތް ކުރުމުގައި އެ ކުންފުނި ދެމިއޮންނާނެ ކަމުގެ ޔަގީން ކަން ވެސް ވަނީ ދީފައެވެ.
