މިއަދުން ފެށިގެން އަނެއްކާވެސް ރާއްޖޭގެ ބޮޑު ބަޔަކަށް މޫސުން ގޯސްވާނެކަމަށް މޫސުމާބެހޭ ގައުމީ އިދާރާ (މެޓް އޮފީހުން) ލަފާކުރުމާއި ގުޅިގެން އެކަމަށް ތައްޔާރުވުމުގެ ގޮތުން އެމްއެންޑީއެފްއާއި ކަމާ ބެހޭ އިދާރާތައް ގުޅިގެން ހާއްސަ އޮޕަރޭޝަނެއް ފަށައިފިއެވެ.
މިކަމާ ގުޅިގެން އެމްއެންޑީއެފް އިން ބުނީ ރާއްޖެއަށް މޫސުން ގޯސްވާނެ ކަމަށް ލަފާކޮށްފައި ވާތީ، ލިބިދާނެ ގެއްލުންތަކުން ރައްކާތެރިވުމަށް ޖޮއިންޓް އޮޕަރޭޝަނެއް ފަށާފައިވާކަމަށާއި މި މަސައްކަތުގެ ދަށުން ޖޮއިންޓް އޮޕަރޭޝަން ސެންޓަރެއް ގާއިމުކޮށްފައިވާ ކަމަށެވެ.
އެމްއެންޑީއެފްގެ އިތުރުން މިއަދު މާލެ ސިޓީ ކައުންސިލުންވެެސް ވަނީ މޫސުން ގޯސްވާނެކަމަށް ލަފާކުރުމާއި ގުޅިގެން އެކަމަށް ތައްޔާރުވުމުގެ ގޮތުން ހާއްސަ ކާރިސާ ކޮމިޓީއެއް އުފައްދާފައެވެ.
ރާއްޖޭގެ އިރުން ހުޅަނގުދެކުނު ބޭ އޮފް ބެންގާލްގައި ކޮޅިގަނޑެއް އުފެދި، އެ ކޮޅިގަނޑު ހުޅަނގަށް ޖެހި ރާއްޖޭގެ ސަރަހައްދުގައި ބޯ ވިއްސާރަ ވިލާ އުފެދުމުގެ ފުރުސަތު ބޮޑުވާނެ ކަމަށް މެޓް އޮފީހުން ވަނީ ބުނެފައެވެ. އެހެން ކަމުން 13 ޖެނުއަރީ 2025 އިން ފެށިގެން 18 ޖެނުއަރީ 2025 އާ ހަމައަށް ރާއްޖޭގެ ބޮޑު ސަރަހައްދަކަށް ގުގުރުމާއެކު ބޯކޮށް ވާރޭ ވެހޭނެ ކަމަށް މެޓުން ވަނީ ލަފާކޮށްފައެވެ.
އިއްޔެ ވެސް ވަނީ މާލެއަށް ބޯކޮށް ވިއްސާރަ ކޮށްފައެވެ. އެގޮތުން އިއްޔެ ކުރި ވިއްސާރައިގެ ސަބަބުން 7 ގޭބިސީ އެއްގެ 44 މީހަކަށް 1 ދުވަހަށް ވަގުތީ ބޯހިޔާވަހިކަމާއި ކެއިން ބުއިންމުގެ އިންތިޒާމު ވަނީ ހަމަޖައްސައިދީފައެވެ.
