ރާއްޖޭގެ އިއާދަކުރަނިވި ހަކަތައިގެ ކެޕޭސިޓީ އަހަރެއްހާ ދުވަހުގެ ތެރޭގައި 53 މެގަވޮޓުން 70 މެގަވޮޓަށް އިތުވެފައިވާ ކަމަށް އެންވާރަމްންޓް މިނިސްޓަރު ތޯރިގް އިބްރާހީމް ވިދާޅުވެއްޖެއެވެ.
ތޯރިގް މިހެން ވިދާޅުވީ، އިންޓަނޭޝަނަލް ރިނިއުބަލް އެނާޖީ އެޖެންސީ (އައިރީނާ) ގެ އެސެމްބްލީގެ 15 ވަނަ ސެޝަންގައި ވާހަކަ ދައްކަވަމުން ރާއްޖޭގައި އިއާދަކުރަނިވި ހަކަތައިގެ ކެޕޭސިޓީ ހުރިކަން ހާމަކުރައްވަމުންނެވެ.
ތޯރިގް ވަނީ ދިޔަ އަހަރުގެ ޑިސެމްބަރު މަހު ޔޫއޭއީގެ ދުބާއީގައި ބޭއްވި ކޮޕް 28 ގައި ރައީސް ޑރ. މުހައްމަދު މުއިއްޒު ދެއްކެވި ވާހަކަފުޅުގެ ހަނދާންތައް އާ ކުރައްވާފައެވެ. 2028 ވަނަ އަހަރުގެ ނިޔަލަށް އިއާދަކުރަނިވި ހަކަތައިގެ ވަސީލަތްތައް މެދުވެރިކޮށް 33 ޕަސެންޓް ކަރަންޓު އުފެއްދަވާނެ ކަމަށް ވިދާޅުވެފައިވާ އިރު، އިތުރު 170 މެގަވޮޓްގެ އިޔާދަކުރަނިވި ހަކަތަ ބޭނުންކުރުމުގެ އެކި މަރުހަލާތަކުގައި ރާއްޖެ ކުރިއަށްދާ ކަމަށް ތޯރިގް ވިދާޅުވިއެވެ.
ރައީސް ކޮޕް ސަމިޓްގައި އެ އިއުލާން ކުރެއްވި އިރާ އަޅާބަލާއިރު، އަހަރެއްހާ ދުވަހުގެ ތެރޭގައި 53 މެގަވޮޓުން 70 މެގަވޮޓަށް އިތުރުވެފައިވާ ކަމަށް ތޯރިގް ވިދާޅުވިއެވެ. މިއީ 17 މެގަވޮޓުގެ ކުރިއެރުމެކެވެ.
މޫސުމަށް އަންނަ ބަދަލުތަކަކީ ރާއްޖެ ފަދަ ކުދި ޖަޒީރާ ގައުމުތަކަށް ކުރިމަތިވެފައިވާ އެންމެ ބޮޑު އެއް މައްސަލަކަން ފާހަގަކުރައްވައި، މޫސުމަށް އަންނަ ބަދަލުތަކަށް ހައްލު ހޯދުމަށް އެއްބަސްވެފައިވާ 1.5 ޑިގްރީގެ އަމާޒަށް ވާސިލުވުމަށް އަވަސް، ހިތްވަރުގަދަ ފިޔަވަޅުތަކެއް އެޅުމަށް ތޯރިގް ގޮވާލެއްވިއެވެ. ދުނިޔޭގެ މުޖުތަމައުން މިހާރު އެކަމަށް އަމަލުކޮށް މި ދުނިޔޭގެ މުސްތަގުބަލު ރައްކާތެރިކޮށް ދޭންޖެހޭ ކަމަށް އޭނާ ވިދާޅުވިއެވެ.
ޔޫއޭއީގެ އަބޫދާބީގައި މިހާރު ކުރިއަށްދާ އައިރީނާ އެސެމްބްލީގައި މިނިސްޓަރު ތޯރިގު އިބްރާހިމްގެ އަރިހުގައި ޔޫއޭއީއަށް ރާއްޖެއިން ކަނޑައަޅާފައި ހުންނަވާ ސަފީރު މުހައްމަދު ހުސައިން ޝަރީފާއި ކްލައިމެޓް ޗޭންޖް މިނިސްޓްރީގެ ޑިރެކްޓާ ޖެނެރަލް އަހުމަދު އަލީ ބައިވެރިވެވަޑައިގެންނެވިއެވެ.
