ދަ ޑިމޮކްރެޓްސްގެ ރައީސްގެ މަގާމުން ހަސަން ލަތީފް އިސްތިއުފާ ދެއްވައިފިއެވެ.
ކުރީގެ ރައީސް މުހައްމަދު ނަޝީދު އިސްވެ ހުންނަވައި އުފެއްދެވި ދަ ޑިމޮކްރެޓްސްގެ ރައީސްކަމުގެ މަގާމުން ހަސަން އިސްތިއުފާ ދެއްވި ސިޓީ ވަނީ ސޯޝަލް މީޑިއާގައި އާންމުވެފައެވެ. ޕާޓީގެ ނައިބު ރައީސަށް އެޑްރެސްކޮށް ފޮނުއްވި އެ ސިޓީގައި ހަސަން އިސްތިއުފާ ދެއްވި ސަބަބެއް ހާމަކޮށްފައި ނުވެއެވެ.
ހަސަން ލަތީފް މަގާމުން އިސްތިއުފާ ދެއްވާފައިވާއިރު އޭނާ އަލުން އެމްޑީޕީއާ ގުޅޭނެ ކަމުގެ އަޑު ފެތުރިފައިވީ ނަމަވެސް އެކަމާ ގުޅިގެން ރަސްމީކޮށް އެއްޗެއް ހާމަކޮށްފައި ނުވެއެވެ. "ދަ ޕްރެސް" އަށް މައުލޫމާތު ދެއްވަމުން ހަސަން ވިދާޅުވީ އޭނާ މަގާމުން އިސްތިއުފާ ދެއްވާފައި ވީ ނަމަވެސް ޕާޓީން ވަކި ނުވާ ކަމަށެވެ.
ޑިމޮކްރެޓްސްގައި އިސްކޮށް ހަރަކާތްތެރިވި އެސްޓީއޯގެ ކުރީގެ އެމްޑީ ހުސެއިން އަމްރު ވެސް ވަނީ އެ ޕާޓީ ދޫކޮށް އަލުން އެމްޑީޕީއާ ގުޅިވަޑައިގެންފައެވެ. އަދި ހަމައެހެންމެ ނައިބް ރައީސް މުހައްމަދު ޝިފާވެސް ވަނީ އެ ޕާޓީގެ ނައިބްރައީސް ކަމުން އިސްތިއުފާދެއްވައި އަނބުރާ އެމްޑީޕީއާ ގުޅިވަޑައިގެންފަ އެވެ.
ދަ ޑިމޮކްރަޓްސްގެ އުފެއްދުމުގައި އިސްކޮށް ހަރަކާތްތެރިވި ނަޝީދު މިހާރު ސިޔާސީ ކަންކަމާ ދުރުގައި ހުންނެވިއިރު ޑިމޮކްރަޓްސްއިން ވަނީ ރައްޔިތުން މަޖިލީހުގައި ވެސް ވާދަކޮށްފައެވެ. ނަމަވެސް އެ ޕާޓީއަށް އެއްވެސް ގޮނޑިއެއް ކާމިޔާބު ކުރެވިފައި ނުވާއިރު އެ ޕާޓީގެ ސިޔާސީ ހަރަކާތްތައްވެސް ވަނީ މަދުވެފައެވެ.
