ރޭ މާލެ އަށް ކުރި ވިއްސާރައިގައި 6753 ޓަނުގެ ފެން ހިއްކާފައި ވާކަމަށް އެމްއެންޑީއެފް އިން ބުނެފިއެވެ.
އެގޮތުން އެމްއެންޑީއެފް އިން ބުނީ އައިޖީއެމްއެޗް ސަރަަހައްދުގައި 3 ޕަމްޕު، މާފަންނު ފެރީ ޓާމިނަލްގައި 3 ޕަމްޕު، ސަލްމާން މިސްކިތް ސަރަހައްދުގައި 1 ޕަމްޕު، ވެސްޓް ޕާކު ސަރަހައްދުގައި 4 ޕަމްޕު، ކުޑަކުދިންގެ ބަގީޗާގައި 1 ޕަމްޕު ބަހައްޓައިގެން މަސައްކަތް ކޮށްފައިވާކަމަށެވެ.
އެމްއެންޑީއެފް އިން ބުނީ މިއަދު ހެނދުނު 6 ޖެހުމާ ހަމައަށް 6753 ޓަނުގެ ފެން ހިއްކާފައިވާކަމަށެވެ. މީގެއިތުރުން މާލޭގެ 2 ސަރަހައްދެއްގައި ވެލިބަސްތާ ޖެހުމުގެ މަސައްކަތް ކުރަމުންދާކަން ފާހަގަކޮށް އެމްއެންޑީއެފް އިން ބުނީ މިހާތަނަށް 46 ގެއަކަށް އެހީތެރިކަން ފޯރުކޮށްދީފައިވާކަމަށެވެ.
ފާހަގަކޮށްލެވޭ ގޮތުގައި މެޓް އޮފީހުން ވަނީ ބޯކޮށް ވާރޭ ވެހުމާއެކު ގުގުރާނެ ކަމަށް ލަފާކޮށް މިއަދު ހެނދުނު 9:00 އިން 13:00 އާ ހަމައަށް ށ. އަތޮޅުން ފެށިގެން ތ. އަތޮޅަށް ރީނދޫ ސަމާލުވެސް ނެރެފައެވެ.
ގަދަވަޔާއެކު ކަނޑުތައް ގަދަވެ، ބޯކޮށް ވާރޭވެހޭނެ ކަމަށް ލަފާކުރެވޭތީ މެޓް އޮފީހުން ވަނީ ހުރިހާ ފަރާތްތަކުން މޫސުމަށް ސަމާލުވުމަށް އިލްތިމާސް ކޮށްފައެވެ. އަދި ކަނޑުދަތުރުކުރާ ފަރާތްތަކުން، ދަތުރުތަކަށް ފެއްޓުމުގެ ކުރިން އެންމެ ފަހުގެ މޫސުމީ މައުލޫމާތު ހޯދުމަށް ވެސް މެޓް އޮފީހުން އިލްތިމާސްކޮށްފައިވެއެވެ.
