އެކްރެޑިޓޭޝަން އަށް ހުށަނާޅާ މަތީ ތައުލީމުދޭ މަރުކަޒުތަކުން ހިންގާ ޕްރޮގްރާމްތައް އެކްރެޑިޓޭޝަން ހުށަހެޅުމަށް މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ) އެދިއްޖެއެވެ.
އެމްކިއުއޭއިން މިއަދު ނެރުނު ބަޔާނެއްގައި ބުނީ އޮގަސްޓް 2022 ގައި އެމްކިއުއޭއިން ގެޒެޓްކޮށްފައިވާ "ޕްރޮގްރާމް އެކްރެޑިޓޭޝަން ގައިޑްލައިން"ގެ ދަށުން ރާއްޖޭގައި މަތީ ތައުލީމާއި ތަމްރީން ދޭ ގިނަ މަރުކަޒުތަކުން ޕްރޮގްރާމްތަކަށް އެކްރެޑިޓޭޝަން ހޯދަމުން އަންނަ ކަމަށެވެ.
އެހެންނަމަވެސް ބައެއް މަރުކަޒުތަކުން މިއަދާ ހަމައަށް ވެސް ކުރިން އެމްކިއުއޭއިން އެޕްރޫވަލްދީފައިވާ އަދި ހިންގަމުންގެންދާ ޕްރޮގްރާމްތައް މިހާރު އަމަލުކުރަމުންދާ "ޕްރޮގްރާމް އެކްރެޑިޓޭޝަން ގައިޑްލައިން"ގެ ދަށުން އެކްރެޑިޓޭޝަން ހޯދުމަށް ހުށަހަޅާފައިނުވާކަން އެމްކިއުއޭއިން ވަނީ ފާހަގަކޮށްފައެވެ.
"ޕްރޮގްރާމް އެކްރެޑިޓޭޝަން ގައިޑްލައިން" ދިވެހި ސަރުކާރުގެ ގެޒެޓުގައި ޝާއިއުކޮށް އަމަލު ކުރަން ފަށައި އޮކްޓޫބަރު 27، 2027 އަށް 5 އަހަރު ހަމަވާއިރު، އެމްކިއުއޭއިން ވަނީ ޕްރޮގްރާމް އެކްރެޑިޓޭޝަން ގައިޑްލައިންގެ ކުރިން އެ އޮތޯރިޓީއަށް ހުށަހަޅައިގެން އެކްރެޑިޓޭޝަން ހޯދުމަށް އެދިފައެވެ.
އެމްކިއުއޭއިން ބުނީ ޖެނުއަރީ 1، 2027 އާ ހަމައަށް ނަގާ އިންޓޭކްތައް ޕްރޮގްރާމް ނިމެންދެން ކުރިއަށް ގެންދެވޭނެ ކަމަށެވެ. އަދި މި ޕްރޮގްރާމްތަކަށް އިތުރު އިންޓޭކެއް ނެގޭނީ ޕްރޮގްރާމް އެކްރެޑިޓޭޝަން ލިބުމަށްފަހުގައި ކަމަށް ވެސް އެ އޮތޯރިޓީއިން ވަނީ ބުނެފައެވެ.
2022 އިން ފެށިގެން އާ އެކްރެޑިޓޭޝަން ގައިޑްލައިންގެ ދަށުން އެކްރެޑިޓްކޮށްފައިވާ 2027 އާ ހަމައަށް 5 އަހަރު ހަމަވާ ޕްރޮގްރާމްތައް "ޕްރޮގްރާމް އެކްރެޑިޓޭޝަން ގައިޑްލައިން"ގެ ދަށުން ހިންގަން ހުއްދަ ދެވިފައިވާ މުއްދަތު ހަމަނުވާނީސް އަލުން އެކްރެޑިޓޭޝަންއަށް ހުށަހެޅުމަށް ވެސް އެމްކިއުއޭއިން ވަނީ އެދިފައެވެ.
