އުމުރާ ނުގުޅޭ ވާހަކަ ދައްކާ ދަރުވަރުންތަކަކާ ގްރޫމްކުރި ކަމުގެ ތުހުމަތުގައި ހައްޔަރުކުރި ޓީޗަރު ބަންދުން ދޫކޮށްލަން މެޖިސްޓްރޭޓް ކޯޓުން އަމުރުކުރީ ގޯސްކޮށް ކަމަށް ހައި ކޯޓުން އަމުރުކޮށްފި އެވެ.
ކުޑަކުދިންތަކަކާ އުމުރާ ނުގުޅޭ ވާހަކަތަކެއް ދެއްކުމުގެ ތުހުމަތުގައިވާ 29 އަހަރުގެ ދިވެހި ޓީޗަރެއްގެ މައްސަލަ ފުލުހުން ބަލަން ފަށާފައި ވަނީ މިދިޔަ އޮކްޓޯބަރު 17 ވަނަ ދުވަހުއެވެ. އަދި ކޯޓު އަމުރެއްގެ ދަށުން އެ ޓީޗަރު ހައްޔަރުކޮށްފައި ވަނީ ހަމަ އެމަހުގެ 27 ވަނަ ދުވަހުއެވެ.
އެ މައްސަލައާއި ގުޅިގެން އެ ޓީޗަރު ފުރަތަމަ ބަންދު ކުރީ 20 ދުވަހަށް ނަމަވެސް އެ މުއްދަތު ހަމަވުމުން ބަންދުގެ މުއްދަތު ވަނީ 30 ދުވަހަށް އިތުރު ކޮށްފައެވެ. ނަމަވެސް އެ މުއްދަތު ހަމަ ނުވަނީސް މެޖިސްޓްރޭޓް ކޯޓުން ވަނީ ވަކި ޝަރުތުތަކަކާއެކު އޭނާ ދޫކޮށްލުމަށް ނިންމާފައެވެ. މެދުރާއްޖެތެރޭ ރަށެއްގެ ކޯޓުގެ މެޖިސްޓްރޭޓް ނެރުއްވި އަމުރު ދައުލަތުން ހައި ކޯޓުގައި އިސްތިއުނާފުކޮށް އިއްޔެ ކުރި ހުކުމުގައި ވަނީ ކުޑަކުދިންނަށް ޖިންސީ ގޯނާކުރާ މީހުންނަކީ މުޖުތަމައުގެ ސަލާމަތަށް ނުރައްކަލެއްކަމަށް ފާހަގަކޮށްފައެވެ.
އަދި ކުރިން މިފަދަ ތުހުމަތެއް ނެތް ނަމަވެސް، އެހެން ކުޑަކުދިން ރައްކާތެރިކުރުމަށްޓަކައި، އަދި ފުލުހުން ހުށަހެޅި ލިޔެކިޔުންތަކަށް ބަލާއިރު ތުހުމަތުކުރެވޭ ޓީޗަރުގެ ދިރިއުޅުމުގެ ވައްޓަފާޅި ހުރީ ކުޑަކުދިންނަށް ރައްކާތެރި ގޮތަކަށް ނޫންކަމަށް ބުރަވެވޭތީ، ތިން ފަނޑިޔާރުންގެ އިއްތިފާގުން ވަނީ މެޖިސްޓްރޭޓް ކޯޓުގެ ނިންމުން ބަދަލުކޮށްފައެވެ. އަދި ހަމައެހެންމެ
އިތުރު ގޮތެއް ނިންމަންދެން 7 ދުވަހުގެ މުއްދަތަށް އޭނާ ބަންދުގައި ބެހެއްޓުމަށް އަމުރުކޮށްފައެވެ.
ކުޑަކުދިންނާ ގުޅޭ މައްސަލަތަކީ ސީރިއަސް މައްސަލަތަކަށްވާތީ ކުއްޖާގެ އައިޑެންޓިޓީ ރައްކާތެރިކުރުމުގެ ގޮތުން ކުއްޖާގެ އަތޮޅާއި ރަށް ފުލުހުން ހާމަކޮށްފައެއް ނުވެއެވެ.
