މަޝްހޫރު ވާހަކަ ލިޔުންތެރިޔާ ކޮލީން ހޫވާ (ކޯހޯ) ލިޔުނު މަގްބޫލު ވާހަކަ ފޮތް "ވެރިޓީ" އަށް ފިލްމެއް ހަދަން އުޅޭކަން އިއުލާންކޮށް ފިލްމުގެ ބައެއް ކާސްޓުން އިއުލާންކޮށްފިއެވެ.
ކޯހޯގެ އިންސްޓަގްރާމް އެކައުންޓުގައި ކުރި ޕޯސްޓެއްގައި ބުނީ މި ފިލްމުގައި ހަރަކާތްތެރިވާނީ ޑަކޯޓާ ޖޯންސަން، ޖޯޝް ހާނެޓް އަދި އޭން ހާތްވޭ ކަމަށެވެ. ފިލްމުގައި ވެރިޓީގެ ރޯލު ކުޅޭނީ އޭން އެވެ. އަދި ޑަކޯޓާގެ ރޯލު ލޯވެން ކުޅޭއިރު ޖާމީގެ ކެރެކްޓާ ކުޅޭނީ ޖޯޝްއެވެ. ފިލްމުގެ ކާސްޓު އިއުލާންކުރުމާއެކު ފޭނުން ހިތްހަމަޖެހިފައިވާއިރު ފޭނުން ބުނަނީ މި ފިލްމަށް ކަނޑައެޅި ކާސްޓުންނަށް ވާހަކަ ފޮތުގެ ކެރެކްޓާތަކަށް އިންސާފު ހޯދައިދެވޭނެ ކަމަށެވެ. ވެރިޓީ ވާހަކަ ފޮތަކީ ސައިކޮލޮޖިކަލް ތުރިލާއެކެވެ.
ވާހަކަ ލިޔުމަށް ޝައުގުހުރި ނަމަވެސް ލިޔަން ދަތިކަމެއް ކުރިމަތިވެފައިވާ ލިޔުންތެރިއެއް ކަމަށްވާ ލޯވެން އޭޝްލީ އަށް ތަފާތު ޓާސްކެއް ލިބެއެވެ. އޭނާ އަށް ލިބޭ ޓާސްކަކީ ކާރު އެކްސިޑެންޓަކަށް ފަހު ވެޖެޓޭޓިވް ހާލަތެއްގައި ހުރި އެންމެ މޮޅު ވާހަކަ ލިޔުންތެރިޔާ ވެރިޓީ ކްރޮފޯޑްގެ ބާކީ ހުރި ފޮތްތައް ނިންމާލުމަށެވެ. އެ ޓާސްކު ފުރިހަމަކުރަން ލޯވެން އެއްބަސްވަނީ ކުރިއަށް ކަންތައް ވެގެންދާނެ ގޮތް އެއްވެސް ވަރަކަށް ނޭނގިއެވެ. އެ މަސައްކަތް ކުރަމުން ދަނިކޮށް ލޯވެންއަށް ވެރީޓީގެ ސިއްރު އޮޓޯބަޔޮގްރަފީ ފެނެއެވެ. ލޯވެން އެ ފޮތް ހުޅުވާލުމަށްފަހު ކިޔަން ފެށީ އޭނާގެ ދިރިއުޅުމަށް ތޫފާނެއް އަންނަކަން އިހުސާސްނުވެއެވެ. އޮޓޯބަޔޮގްރަފީ އިން ލޯވެން އަށް، ވެރީޓީގެ އަންހެން ދަރިފުޅު މަރުވި ދުވަހު ހިނގި ކަންތައްތަކާ ބެހޭ ގޮތުން ސިއްސުވާލާފަދަ ކަންތައްތަކެއް ހާމަވެއެވެ. ލޯވެން އެ މެނުސްކްރިޕްޓް ވެރީޓީގެ ފިރިމީހާ ޖާމީއަށް ފޮރުވާލި ނަމަވެސް އޭނާއާ މެދު ލޯވެންގެ ހިތުގައި އިހުސާސްތައް ވަރުގަދަވެ، އޭނާއަށް އެ މެނުސްކްރިޕްޓް ކިޔަން ދޫކޮށްލުމުން ލިބޭނެ ފައިދާތަކާ މެދު ވިސްނަން ފަށައެވެ. ނަމަވެސް ލޯވެން އަށް މަޖުބޫރުވަނީ އެ މެނުސްކްރިޕްޓް ކިޔުމަށެވެ.
ކޮލީން ވަނީ އޭނާގެ އެންމެ ކާމިޔާބު އެއް ވާހަކަ ފޮތް "އިޓް އެންޑްސް ވިތް އަސް" އަށް ވެސް ފިލްމެއް ހަދާފައެވެ.
