ގ. އުފުރިޔާ ގޭގެ އެޕާޓްމެންޓެއްގައި ރޭގައި ހިނގި އަލިފާނުގެ ހާދިސާގައި އެކަކަށް ވަގުތީ ބޯހިޔާވަހިކަން ދީފިއެވެ.
ނޭޝަނަމް ޑިޒާސްޓާ މެނޭޖްމެންޓު އޮތޯރިޓީ (އެންޑީއެމްއޭ) އިން ބުނީ މި އަލިފާނުގެ ހާދިސާއާއި ގުޅިގެން އެ އެޕާޓްމަންޓުގައި ދިރިއުޅުނު މީހުންގެ ތެރެއިން އެހީތެރިކަން ބޭނުންވި އެއް ފަރާތަކަށް 1 ދުވަހުގެ މުއްދަތަށް ވަގުތީ ބޯހިޔާވަހިކަމާއި ކެއިންބުއިމުގެ އިންތިޒާމު އެ އޮތޯރިޓީ އިން ހަމަޖައްސައިދީފައިވާ ކަމަށެވެ.
މި ހާދިސާ ހިނގާފައިވަނީ ރޭ 11:27 ކަންހާއިރު ކަމަށާއި އެ ގޭގައި ރޯވި އަލިފާންގަނޑު ކޮންޓްރޯލް ކުރެވިފައިވަނީ ރޭ 12:01 ހާއިރު ކަމަށް އެމްއެންޑީއެފްއިން ވަނީ ބުނެފައެވެ.
ނަމަވެސް މި ހާދިސާގައި އެއްވެސް މީހަކަށް އަނިޔާވި ކަމުގެ ރިޕޯޓެއް ލިބިފައެއް ނުވެއެވެ.
ފާހަގަކޮށްލެވޭ ގޮތުގައި މިދިޔަ އަހަރުގެ ޑިސެމްބަރު 12 ވަނަ ދުވަހުވެސް ވަނީ ސަރުކާރުގެ ތިން މިނިސްޓްރީއެއް ހިންގަމުން އައި މ. ގްރީން ބިލްޑިންގް އިމާރާތުގައި ބޮޑު އަލިފާނުގެ ހާދިސާއެއް ހިންގާފައެވެ. މި ހާދިސާއާއި ގުޅިގެން 22 ފަރާތަކުން ވަނީ ވަގުތީ ހިޔާއަށް އެންޑީއެމްއޭ އިން ބަދަލުކޮށްފައެވެ.
އެންޑީއެމްއޭ އިން ބުނީ މި ހާދިސާގެ އަސަރު ކުރި ގެތަކުގެ ބައެއް މީހުން ތިބުމަށް ގެސްޓް ހައުސް ހަމަޖައްސައިދިން ކަމަށާއި އަދި އަނެއްބައި މީހުން ބޭނުން ތަނެއްގައި ތިބުމަށް ފައިސާ ދީފައިވާނެ ކަމަށެވެ.
