އެޗްޑީސީގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ދިރިއުޅޭ ގެ ފުލުހުން ބަލައި ފާސްކުރި އިރު، ގިނަ އަދަދެއްގެ ފައިސާ ހުރި ދަބަހެއް ފެނިފައިވާ ކަން 'ދަ ޕްރެސް' އަށް އެނގިއްޖެއެވެ.
މައުލޫމާތު ލިބިފައިވާ ގޮތުގައި، ބިންވެރިޔާ އަދި ގެދޮރުވެރިޔާ ސްކީމާ ގުޅިގެން ފުލުހުން ހިންގި ތަހުގީގުގައި ފަޒުލް ދިރިއުޅޭ ގެ މިދިޔަ މަހުގެ 23 ވަނަ ދުވަހު ބަލައި ފާސްކޮށްފައިވާ އިރު، އެގެއިން ވަނީ ގިނަ އަދަދެއްގެ ފައިސާ ފެނިފައެވެ.
ކޯޓު އަމުރެއްގެ ދަށުން ފުލުހުން އެ ގެ ބަލައި ފާސްކުރި އިރު، ފެނިފައި ވާ ފައިސާ ހުރި ދަބަސް ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. މައުލޫމާތު ލިބިފައިވާ ގޮތުގައި އެ ދަބަބަހުގައި މިލިއަނަކަށް ވުރެ ގިނަ ފައިސާ ހުއްޓެވެ.
މި ކަމާ ގުޅިގެން ފުލުހުންނާ ސުވާލު ކުރި ނަމަވެސް އަދި ޖަވާބެއް ލިބިފައެއް ނުވެއެވެ
ފަޒުލްގެ ގެ ބަލައި ފާސްކޮށް ތަހުގީގަށް ބޭނުންވާ ބައެއް ތަކެތި ގެންގޮސްފައިވާފުލުހުން ބުނެފައި ވަނީ ބައެއް އިލެކްޓްރޯނިކް ސާމާނު ހިމެނޭ ކަމަށެވެ. އިތުރު ތަފްސީލެއް ފުލުހުން ހާމައެއް ނުކުރެއެވެ.
ބިންވެރިޔާ ސްކީމްގެ ދަށުން ގޯތި ލިބޭ މީހުންގެ ލިސްޓުގައި ނެތް ބަޔަކަށް ގޯތި ދޫކުރި މައްސަލައެއް ފެންމަތިވުމާއެކު ފުލުހުންނާއި އޭސީސީއިން ދަނީ މި މައްސަލައިގެ ޖިނާއީ އަވަސް ތަހުގީގެއް ކުރަމުންނެވެ.
މި މައްސަލައާ ގުޅިގެން މިދިޔަ މަހުގެ 20 ވަނަ ދުވަހު 20 މީހެއްގެ ޕާސްޕޯޓް ހިފަހައްޓާފައި ވީ ނަމަވެސް، މިދިޔަ މަހުގެ 30 ވަނަ ދުވަހު ވަނީ އޭގެތެރެއިން 9 މީހެއްގެ ޕާސްޕޯޓް ދޫކޮށްލާފައެވެ. ޕާސްޕޯޓް ދޫކޮށްލި މީހުންގެ ތެރޭގައި ފަޒުލް ރަޝީދާއި އޭނާގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދުގެ ޕާސްޕޯޓެއް ނުހިމެނެއެވެ.
