ހުޅުމާލޭގެ ދެވަނަ ފިޔަވަހީގައި، ފުލުހުންގެ ކާރަކާއި ސައިކަލެއް ޖެހި ހިނގި އެކްސިޑެންޓު ގެ މަންޒަރު ދުއްފަރާތެއް ހޯދުމަށް ފުލުހުން އާންމުންގެ އެހީތެރިކަމަށް އެދިއްޖެއެވެ.
މިދިޔަ ޑިސެންބަރު 27 ވަނަ ދުވަހުގެ 01:45 ހާއިރު ހުޅުމާލެ ފޭސް 2 ގެ ނިރޮޅުމަގާއި ގުލްއަލާމާހިނގުން ގުޅޭ ހިސާބުގައި ފުލުހުންގެ ކާރަކާއި ސައިކަލެއް ޖެހި ހިނގި އެކްސިޑެންޓުގައި ޒުވާނަކަށް ވަރަށް ބޮޑަށް އަނިޔާވެފައިވާއިރު، ފުލުހުން ވަނީ މި އެކްސިޑެންޓު ހިނގި ގޮތް ބަލަމުން އަންނަކަމަށް ބުނެފައެވެ.
މީގެ އިތުރުން ފުލުހުން ވަނީ މި އެކްސިޑެންޓް ހިނގި ވަގުތު މަންޒަރު ދުއްފަރާތެއް ވާނަމަ ޓްރެފިކް އިންވެސްޓިގޭޝަންގެ ނަންބަރު 9444880 އަށް ގުޅުއްވައި މައުލޫމާތު ހިއްސާކުރުމަށް އެދިފައެވެ.
މީގެ ކުރިން ފުލުހުން ބުނީ އެކްސިޑެންޓް ހިނގީ ފުލުސް ކާރު ގުލްއަލާމަގު، އިރުން ހުޅަނގަށް ނިރޮޅުމަގު ހުރަސްކުރި ވަގުތު ބާރު ސްޕީޑުގައި ނިރޮޅުމަގުން އުތުރުން ދެކުނަށް ދުއްވާފައި އައި ސައިކަލަކާ ޖެހިގެން ކަމަށެވެ. އެކްސިޑެންޓުގައި ސައިކަލް ދުއްވަން އިން 18 ޒުވާނާއަށް އަނިޔާވުމުގެ ސަބަބުން ފަރުވާ ދިނުމަށް އެންމެ ފުރަތަމަ ގެންދިޔައީ ހުޅުމާލެ ހޮސްޕިޓަލަށެވެ. އަދި ފަހުން އިތުރު ފަރުވާއަށް އައިޖީއެމްއެޗްއަށް ވަނީ ބަދަލުކޮށްފައެވެ.
