މާލެއަށް ކުރި ވިއްސާރައިގައި ގެއްލުން ވަޒަން ކުރުމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ގޭގެއަށް ގޮސް އެސެސްމެންޓު ހަދަން ނިންމާފައިވާކަމަށް އެންޑީއެމްއޭ އިން ބުނެފިއެވެ.
"ދަ ޕްރެސް" އަށް މައުލޫމާތު ދެއްވަމުން އެންޑީއެމްއޭގެ ސީއީއޯ ހިސާން ހަސަން ވިދާޅުވީ މި އެސެސްމެންޓު ހެދުމުގެ މަސައްކަތް މާދަމާ ފަށާނެ ކަމަށާއި މިހާރު ވިއްސާރައިގައި ލިބުނު ގެއްލުންތަކުގައި ވަގުތީ ހިޔާތަކުގައި ތިބި މީހުން ކުރިއަށް އޮތް ދެ ދުވަހުގެ ތެރޭގައި ގެތަކަށް ލިބުން ގެއްލުން ދެނެގަތުމަށްފަހު ބަދަލުކުރަމުން ދާނެ ކަމަށެވެ.
އިއްޔެ މާލެއަށް ކުރި ވިއްސާރައިގައި މާލޭގައި ފެންބޮޑުވުމުގެ ސަބަބުން އެހީތެރިކަމަށް އެދި 774 ތަނަކުން ރިޕޯޓްކުރި ކަމަށާއި 226 މީހުންނަށް ބޯހިޔާވަހިކަން ފޯރުކޮށްދޭން ޖެހުނު ކަމަށް އެންޑީއެމްއޭ އިން ވަނީ ބުނެފައެވެ. އޭގެތެރެއިން 554 ރިކުއެސްޓަކީ ވެލި ބަސްތާ ޖެހުމަށް ކޮށްފައިވާ ރިކުއެސްޓުކަމަށާއި މާލެއިން ޒަރޫރީ ބޭނުންތަކަށް ހުރަސް އެޅިގެންވެސް 53 ގެއަކުން ރިޕޯޓްކޮށްފައިވާ ކަމަށް އެންޑީއެމްއޭ އިން ވަނީ ބުނެފައެވެ. އާންމު ދިރިއުޅުމަށް ހުރަސް އެޅިފައިވާ 36 ގޭބިސީގެ 226 މީހުންނަށް ވަގުތީ ބޯހިޔާވަހިކަން ފޯރުކޮށް ދީފައިވާކަމަށްވެސް އެންޑީއެމްއޭ އިން ވަނީ މައުލޫމާތު ދީފައެވެ.
އިއްޔެ ފަތިހު ވާރޭ ވެހެން ފެށިގޮތަށް ވާރޭ ވެހުން މެދުކަނޑާލާފައި ވަނީ ރޭގެ 7:30 ހާއިރުއެވެ. އެއަށް ފަހު ރޭގެ 10 ޖެހުމާ ހަމައަށް އައި އިރު ވެސް މާލޭގެ މަގުތަކުން ފެން ހިނދިފައެއް ނުވެއެވެ. އާންމުކޮށް މާލޭގައި ފެންބޮޑުވާ ސަރަހައްދުތަކުގައި ހުރި އެތައް ގެތަކަކާއި ފިހާރަތަކެއްގެ ތެރެއަށް ފެން ވަދެ އާންމުން އަމިއްލައަށް ފެންހިނދުމަށް ވަނީ އެތައް މަސައްކަތެއް ކޮށްފައެވެ. އެގޮތުން މާލޭގެ 11 ސަރަހައްދެއްގައި 16 ޕަންޕު ބަހައްޓައިގެން ފެން ހިންދުމުގެ މަސައްކަތް ވަނީ ކޮށްފައެވެ.
އިއްޔެ މާލޭގެ ގިނަ ސަރަހައްދުތަކަކުން ފެން ހިންދުމުގެ މަސައްކަތް ކޮށްފައިވާ އިރު މިހާރު ފެން ހިންދުމުގެ މަސައްކަތް ކުރަމުން ދަނީ ވެސްޓް ޕާކް ސަރަހައްދުގައި އެކަންޏެވެ. މިއަދު ހެނދުނު 7:45 އާ ހަމައަށް މަލެއިން ވަނީ 30،406 ޓަނުގެ ފެން ހިންދާފައެވެ.
