ރާއްޖެއަށް މިހާރު ކުރަމުންދާ ވިއްސާރައިގައި އުތުރާއި މެދުރާއްޖެ ތެރޭގެ ބައެއް ރަށްރަށަށް ގުގުރުމާއެކު ބޯކޮށް ވާރޭ ވެހޭނެ ކަމަށް މޫސުމާ ބެހޭ އިދާރާ މެޓް އޮފީހުން ބުނެފިއެވެ.
ކުރިއަށް އޮތް 48 ގަޑިއިރު ތެރޭގެ މޫސުން ލަފާ ކުރާ ގޮތް ހާމަ ކުރަމުން މިއަދު މެޓް އޮފީހުން ބުނެފައި ވަނީ މިހާރު ކުރަމުން އަންނަ ވިއްސާރައިގައި މޫސުން ރަނގަޅުވަމުން އަންނާނެ ކަމަށް ލަފާ ކުރެވޭ ކަމަށެވެ. ނަމަވެސް މިއަދުގެ އިރުއޮއްސި 6 ޖެހުމާ ހަމައަށް އުތުރާއި މެދުރާއްޖެތޭރެގެ ބައެއް ރަށްރަށަށް ގުގުރުމާއެކު ބޯކޮށް ވާރޭ ވެހޭނެ ކަމަށް އެ އޮފީހުން ބުނެއެވެ. އަދި ދެކުނުގެ މަދު ރަށްތަކަކަށް މި ކެރީގެ އަސަރު ކުރި ނަމަވެސް އާންމު ގޮތެއްގައި މޫސުން ރަނގަޅު ވާނެ ކަމަށް އެ އޮފީހުން ބުނެއެވެ.
ހަމައެއާއެކު ދެކުނުގެ ސަރަހައްދަށް ހުޅަނގާއި ހުޅަނގު އުތުރުން އެހްނ ހިސާބުތަކަށް އިރުއުތުރާއި އުރުން 8 މޭލައި 18 މޭލާ ދެމެދުގެ ބާރުމިނުގައި ވައި ޖެހޭނެ ކަަމަށް މެޓް އޮފީހުން ބުނެއެވެ. އުތުރާއި މެދުރާއްޖެ ތެރޭގައި ވިލާގަނޑުގައި ގަޑިއަކު 35 މޭލަށް ވައިގަދަވުން އެކަށީގެންވާ ކަމަށް އެ އޮފީހުން ބުނެއެވެ.
ކަނޑު އާދައިގެ ވަރަކަށް ގަދަ ވާނެ ކަމަށާއި ވިލާގަނޑު ގަދަ ވާނެ ކަމަށް ވެސް އެ އޮފިހުން ބުނެއެވެ. އަދި ރާޅުގެ އުސް މިން 4 ފޫޓާއި 6 ފޫޓަށް އުފުލޭނެ ކަމަށް ވެސް މެޓް އޮފީހުން ބުނެއެވެ.
ރާއްޖެއަށް އިއްޔެ ކުރި ވިއްސާރައިގައި މެދުރާއްޖެތޭރެގެ ގިނަ ރަށްރަށަށް ގިނަ އިރު ވާރޭ ވެހި ވަނީ ފެންބޮޑުވެފައެވެ. އެ ގޮތުން މާލޭ ސަރަހައްދަށް ވަނީ 12 ގަޑީއިރުގެ ދިގު ވއްސާރައެއް ކޮށްފައެވެ. އެއާއެކު މުޅި މާލެ ވަނީ ވަރަށް ބޮޑަށް ފެންބޮޑުވެ އެތައް ގެތަކަށް ފެންވަދެ ގެންލުންވެފައެވެ.
