ސްރީލަންކާގައި ދިރިއުޅޭ ދިވެހި ރައްޔިތުންނަށް ވިސާ ހޯދުމުގައި ހާއްސަ ފަސޭހަތަކެއް ދިނުމަށް ނިންމާފައިވާ ކަމަށް ކޮލަމްބޯގައި ހުންނަ ދިވެހިރާއްޖޭގެ ހައި ކޮމިޝަނުން ބުނެފިއެވެ.
މިއަދު ނެރުނު ބަޔާނެއްގައި ހައި ކޮމިޝަނުން ބުނީ ސްރީލަންކާގެ މޫސުމީ ހާލަތު ގޯސްވެފައިވާތީ އެ ގައުމުގެ އިމިގްރޭޝަން އެންޑް އެމިގްރޭޝަން ޑިޕާޓްމަންޓުން ވިސާއާ ގުޅިގެން ހާއްސަ ފަސޭހަތަކެއް ދީފައިވާ ކަމަށެވެ. ސްރީލަންކާގެ އިމިގްރޭޝަން އެންޑް އެމިގްރޭޝަން ޑިޕާޓްމަންޓުން ދިން މައުލޫމާތަށް ބިނާކޮށް ހައި ކޮމިޝަނުން ބުނީ، މި މަހުގެ 28 ނުވަތަ އެ ދުވަހަށްފަހުގެ ތާރީހެއްގައި ސްރީލަންކާ އިން ފުރަން ހަމަޖެހިފައިވާ ބިދޭސީން މޫސުމީ ހާލަތުގެ ސަބަބުން ފުރަން ނުކުޅެދިއްޖެ ނަމަ އެފަދަ މީހުންނަށް ވިސާ އިތުރުކުރުމުގެ ފީއާއި ޖޫރިމަނާ ދައްކަން ނުޖެހޭނެ ކަމަށެވެ.
ކުރު މުއްދަތުގެ ޓޫރިސްޓް ވިސާ ނުވަތަ ބިޒްނަސް ވިސާ ހޯލްޑަރުންނާއި ރެޒިޑެންސް ވިސާ ހޯލްޑަރުންނަށް ވިސާ އިތުރު ކުރުމަށް ކުރުމަށް ހަތް ދުވަހުގެ ގްރޭސް ޕީރިއަޑެއް ދޭނެ ކަމަށް ވެސް ހައި ކޮމިޝަނުން ބުނެއެވެ. ކުރު މުއްދަތުގެ ޓޫރިސްޓް ވިސާ އިތުރުކުރުން އިމިގްރޭޝަންގެ އޮންލައިން ޕޯޓަލް މެދުވެރިކޮށް ކުރެވޭނެ ކަމަށް ހައި ކޮމިޝަނުން ބުނެފައި ވެއެވެ.
އަވަސް އެހީތެރިކަމަށް ހައި ކޮމިޝަނުގެ ހޮޓްލައިން ނަމްބަރު 6666 881 76 94+ އަށް ގުޅުމަށާއި، އީމެއިލް މެދުވެރިކޮށް ނަމަ [email protected] އަށް އީމެއިލް ކުރުމަށް ހައި ކޮމިޝަނުން އެދިފައި ވެއެވެ. ހައި ކޮމިޝަނުން ބުނީ ހާލަތު ބަލަމުން ގެންދާނެ ކަމަށާއި، ބޭނުންވާ ގޮތަށް އިތުރު އަޕްޑޭޓްތައް ދެމުން ގެންދާނެ ކަމަށެވެ.
ބާރުގަދަ ތޫފާނެއް ކަމުގައިވާ ދިތުވާއާ ގުޅިގެން އަވަށްޓެރި ސްރީލަންކާއަށް ކުރަމުންދާ ވިއްސާރައިގައި އެ ގައުމަށް ބޮޑެތި ގެއްލުންތަކެއްވެ އެތައްބަޔަކު މަރުވެ އެތައް ބަޔަކު ވަނީ ހާލުގައި ޖެހިފައެވެ.
