މާލެ އަށް ވެހުނު ބޯ ވާރެ އާ ގުޅިގެން މިހާތަނަށް 10 ހާހެއްހާ ޓަނުގެ ފެން ބޭރުކޮށްފައިވާ ކަމަށް ސިފައިން މިރޭ ހާމަކޮށްފިއެވެ.
މިއަދު ހެނދުނު 11 އިން ފެށިގެން ވެހުނު ވާރޭގެ ސަބަބުން މާލޭގެ މަގުތަކުގައި ފެން ބޮޑުވެ ގޭބިސީތަކަށާއި ފިހާރަތަކަށް ފެން ވަދެ، އެކި ގެއްލުންތައް ލިބިފައިވެއެވެ. މިގޮތުން ލިބުނު ގެއްލުމުގެ އަދަދު ލައްކައަކަށް ވުރެ ބޮޑު ވާނެ ކަމަށް ބައެއް ވިޔަފާރިތަކުން ބުނެފައި ވެސް ވެއެވެ.
ސިފައިން ބުނީ، މާލޭގެ ހަ ސަރަހައްދެއްގައި 16 ޕަމްޕުތައް ބަހައްޓައި ފެން ހިންދުމުގެ މަސައްކަތްކުރަމުން ދާ ކަމަށެވެ. އެގޮތުން ވެސްޓް ޕާކު ސަރަހައްދާއި އައިޖީއެމްއެޗް ސަރަހައްދުގައި ފަސް ޕަމްޕާއި، ސަލްމާން މިސްކިތް ހުންނަ ސަރަހައްދުގައި ތިން ޕަމްޕާއި، ބޮޑު ވަޅާއި މާފަންނު ފެރީ ޓާމިނަލާއި ދިވެހިރާއްޖޭގެ އަޑުގެ ސަރަހައްދުގައި ޕަމްޕެއް ބަހައްޓައި ފެން ހިންދަމުންދާ ކަމަށް ސިފައިން ބުންޏެވެ.
މިރޭ 8:30 ގެ ނިޔަލަށް މާލެއިން 9،917 ޓަނުގެ ފެން ބޭރުކުރެވުނު ކަމަށް ސިފައިން މައުލޫމާތު ދެއެވެ.
ފާއިތުވި 24 ގަޑިއިރުގެ ތެރޭ މާލެ އަށް 160 މިލިމީޓަރުގެ ވާރޭ ވެހިފައިވެއެވެ. އޭގެ ތެރެއިން އެންމެ ބޯކޮށް ވެހުނީ މިއަދު ހަވީރު 5 އާއި އިރުއޮއްސި 6 އާ ދެމެދެވެ.
