ޑާކްރެއިން އެންޓަޓެއިންމަންޓުން އުފެއްދި ވެބް ސީރީޒް "ރޯލީމޭ" މީޑިއާނެޓްގެ އެމްސްޓީވީގައި ސްޓްރީމްކުރަން ފަށައިފިއެވެ.
ޖުމްލަ 15 އެޕިސޯޑަކަށް ބަހާލައިގެން ގެނެސްދޭ މި ވެބް ސީރީޒްގެ ދެ އެޕިސޯޑެއް މިހާރު އާންމުންނާ ހަމައަށް ދައްކާލާފައިވާއިރު ސީރީޒްގެ ތިން ވަނަ އެޕިސޯޑު ދައްކާނީ އަންނަ ހޯމަ ދުވަހުއެވެ. މި ސީރީޒަކީ ޑާކް ރެއިނުން އޮކްޓޯބަރުގައި ގެނެސްދިން ހޮރޯ-ކޮމެޑީ "ބިބީ" ލިޔެ، ޑައިރެކްޓްކުރި ޝަހުދާ މަހުމޫދުގެ ސްކްރީންޕްލޭއަކަށް އަލީ ޝިފާއު (ޗިއްޕެ) ޑައިރެކްޓްކޮށްފައިވާ ސީރީޒެއްވެސް މެއެވެ. "ރޯލީމޭ" ގައި ހަރަކާތްތެރިވާނެ ތަރިންނަކީ ޝަރަފު އަބްދުﷲ، މަރިޔަމް މަޖުދާ (މަޖޫ)، މޫސާ އަލީފް، ނުޒުހަތު ޝުއައިބް (ނުޒޫ)، ރޯނު ހަސަން މަނިކު، އައިމިނަތު ޝުހާ، ޝީލާ ނަޖީބް އަދި މަރިޔަމް ހަލީމް އެވެ.
ސީރީޒްގައި މަޖޫ އާއި ޝަރަފް އަކީ އެންމެ ގާތް ދެ ރަހުމަތްތެރިންނެވެ. އަދި ޝުހާ އަކީ ޝަރަފްގެ ލޯބިވެރިޔާއެވެ. ނުޒޫ އާއި އަލީފް ކައިވެނިކޮށްގެން ސީރީޒްގައި އުޅޭއިރު ނުޒޫ އަކީ މަޖޫގެ ވެސް ވަރަށް ގާތް އެކުވެރިއެކެވެ. ޝުހާ އާއި ޝަރަފްގެ ލޯބީގެ ގުޅުމަށް ތޫފާނެެއް އަންނަނީ ޝަރަފްގެ އެންމެ ގާތް އެކުވެރިޔާ މަޖޫއަށް ދިމާވާ ހިތްދަތި ހާދިސާއެއްގެ ސަބަބުންނެވެ.
މީގެ ކުރިންވެސް ޑާކްރެއިނުން ވަނީ ވެބް ސީރީޒް ބެލުންތެރިންނާ ހަމައަށް ގެނެސްދީފައެވެ. އެ ފިލްމު ކުންފުނިން އެންމެ ފަަހުން ބެލުންތެރިންނާ ހަމައަށް ގެނެސްދިން ފީޗާ ފިލްމަކީ "ބިބީ" އެވެ. އެ ފިލްމަކީ ހޮރޯ ކޮމެޑީ ޖޯންރާ އަށް ބިނާކޮށް އުފައްދާފައިވާ ފިލްމެކެވެ. އެ ފިލްމު ވަނީ ރާއްޖެތެރޭގެ އިތުރުން ރާއްޖެއިން ބޭރުގެ ބައެއް ގައުމުތަކުގައި ވެސް އަޅުވާފައެވެ.
