އައްޑޫ ސިޓީގައި ގާއިމުކޮށްފައިވާ ފެން ހިންދާ ނިޒާމުގެ ޕަމްޕްތައް ނަގާ މާލެ ގެންނަން އުޅޭކަމަށް ދެކެވޭ ވާހަކަ މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރު ޑރ.އަބްދުއްﷲ މުއްތަލިބު ދޮގުކޮށްފިއެވެ.
އިންޑިއާގެ އެފްކޮންސް ކުންފުންޏާ ހަވާލުކޮށް ކުރިއަށްގެންދާ އައްޑޫ މަގު ހެދުމުގެ މަޝްރޫއުގެ ތެރެއިން ކުރިއަށް ދާ ޒަމާނީ ފެންދާ ނިޒާމުގެ މަސައްކަތްތައް އަދިވެސް ކުރިއަށްދާއިރު ސޯޝަލް މީޑިއާގައި ބައެއް ފަރާތްތަކުންވަނީ މި މަޝްރޫއުގެ މަސައްކަތައް ބޭނުންކުރާ ޕަމްޕްތައް މާލެ ގެންދާކަމަށް ބުނެ ކަންބޮޑުވުންފާޅުކޮށްފައެވެ. އަދި މި ސާމާންތައް މާލެ ގެންދަން ކުރަމުންދާ މަސައްކަތް ދައްކުވައިދޭ ފޮޓޯތައް ދައުރުކޮށް ސަރުކާރަށްވެސް އަންނަނީ ބޮޑެތި ފާޑުކިޔުންތަކެއް އަމާޒުވަމުންނެވެ.
މި ފާޑުކިޔުންތަކާއި ގުޅިގެން މުއްތަލިބު ވިދާޅުވީ އައްޑޫގެ ފެން ހިންދާ ނިޒާމުގެ މަސައްކަތްތައް އަދި މުޅިން ނުނިމޭކަމަށެވެ. އަދި ޕަމްޕް ސްޓޭޝަންތަކުގައި ބަހައްޓާ ޕަންޕްތައް އިންސްޓޯލްކުރުމާއި ޓެސްޓުކުރުމުގެ މަސައްކަތްތައް، ކޮންޓްރެކްޓަރު މިވަގުތުވެސް ކުރަމުންދާކަމަށް މިނިސްޓްރު ވަނީ ފާހަގަކުރައްވާފައެވެ.
އިންޑިއަން އެގްޒިމް ލައިން އޮފް ކްރެޑިޓް ފެސިލިޓީގެ ދަށުން އައްޑޫ ސިޓީގައި ފެން ހިންދުމުގެ ނިޒާމު ގާއިމުކުރުމާއި، މަގު ހެދުމުގެ މަޝްރޫއު، މިނިސްޓްރީ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗާ އިން އެފްކޯންސް އާއި ހަވާލުކޮށް އެއްބަސްވުމުގައި ސޮއިކޮށްފައި ވަނީ 2022 ވަނަ އަހަރުގެ ތެރޭގައެވެ.
މި މަޝްރޫޢުގެ ދަށުން އައްޑޫ ސިޓީގައި ގާތްގަނޑަކަށް 103 ކިލޯމީޓަރުގެ ފެން ހިންދާ ނިޒާމާއި، އައްޑޫގެ ހުރިހާ އަވަށްތަކެއް ހިމެނޭ ގޮތަށް ޖުމުލަ 40 ކިލޯމީޓަރުގައި ތާރު އެޅާ، އިތުރަށް ގާތްގަނޑަކަށް 60 ކިލޯމީޓަރުގެ މަގުގައި ސިމެންތި ސްޓެބިލައިޒްޑް ލޭޔާ އެޅުމުގެ މަސައްކަތްދަނީ ކުރަމުންނެވެ.
