އާ އަހަރު ފާހަގަކުރުމަށް ފ. ދިގުވަރަށް ދަތުރު ގޮސް އުޅުނު ބަޔަކު ހާލުގައި ޖެހި ރަށަށް އެނބުރި ނާދެވި ތިބި 5 މީހަކަށް ފުލުހުން އެހީތެރިކަން ފޯރުކޮށް ދީފިއެވެ.

ފުލުހުން ބުނީ، ފ. ދިގުވަރަށް ދަތުރު ގޮސް އުޅުނު ބަޔަކު ހާލުގައި ޖެހިފައި ތިބިކަމަށް ފ. ފީއަލީ ޕޮލިސް ޕޯސްޓަށް މައުލޫމާތު ލިބުމާ ގުޅިގެން ފުލުހުންނާއި، ފ. ފީއަލީ ކައުންސިލާއި، އެމްޓީސީސީ ފެރީގެ މުވައްޒަފުންގެ އެހީތެރިކަމާ އެއްބާރުލުމާއެކު އެފަރާތްތައް ފ. ފީއައްޔަށް ގެނެސްދީފައިވާ ކަމަށެވެ.

މި ހާދިސާގެ މައުލޫމާތު 'ދަ ޕްރެސް' އާ ހިއްސާ ކުރަމުން ފީއަލީ ކައުންސިލުން ބުނީ، އެ ރަށުގެ ބަޔަކު ދިގުވަރަށް ދަތުރުގޮސްފައިވާ އިރު، އޭގައި ކުޑަކުދިން ވެސް ހިމެނޭ ކަމަށެވެ. ދަތުރުގެ ބައިވެރިންގެ ތެރޭގައި ތިބި ކުޑަކުދިންނާއެކު އެއް ބަޔަކު ރަށަށް ގެނައުމަށް ފަހު ބާކީ ތިބި މީހުން ބަލައި ދިޔަ ނަމަވެސް އެމީހުންނަށް އެނބުރި ރަށަށް ނާދެވުނު ކަމަށް އެ ކައުންސިލުން ބުނެއެވެ.

އެމީހުންނަށް ފީއައްޔަށް ނާދެވުނީ އިރުއޮއްސި އަނދިރިވުމާއެކު މޫސުންވެސް ގޯސްވުމާ ގުޅިގެންނެވެ. އޭރު ދިގުފަރުގައި ފީއައްޔަށް ނާދެވި ތިން އަންހެނަކާއި ދެ ފިރިހެނަކު ތިބި ކަމަށް ކައުންސިލުން ބުނެއެވެ. އަދި އެމީހުން ރޭގެ ވަގުތެއްގައި ރަށަށް ގެނައި ކަމަށާއި އެންމެންގެ ހާލުވެސް ރަނގަޅު ކަމަށް ކައުންސިލުން ބުނެއެވެ.

އާ އަހަރާ ދިމާކޮށް ޗުއްޓީ ހޭދަކުރުމަށް އާއިލާ އާއި ރައްޓެހިން އެކުގައި ޕިކްނިކް ދަތުރު ދިއުމާއި މަސް ދަތުރު ދިއުމަކީ ދިވެހިންގެ ތެރޭގައި އާންމު ކަމެކެވެ. ނަމަވެސް މި ދުވަސްވަރު ރާއްޖެއަށް ކުރަމުން އަންނަ ވިއްސާރައިގައި މޫސުން ރަނގަޅު ނޫން ކަމަށް ބުނެ އަންނަނީ މޫސުމަށް ސަމާލުވުމަށް ކަމާ ބެހޭ އިދާރާތަކުން އިލްތިމާސް ކުރަމުންނެވެ.

ހަބަރު ފ. ފީއަލި ޕޮލިސް