ކޮންމެ އަހަރެއްގެ ޑިސެމްބަރު މަހަކީ ރާއްޖޭގެ ޓޫރިޒަމް ސީޒަންގެ އެންމެ ތިޔާގި ދުވަސްވަރެވެ. މި ދުވަސްވަރަކީ ރާއްޖެއަށް ޒިޔާރަތް ކުރާ ފަތުރުވެރިންގެ އަދަދު އެންމެ މައްޗަށް ދާ ދުވަސްވަރު ކަމުގައި ވީ ނަމަވެސް މިއަހަރު ޑިސެމްބަރު މަހު ރާއްޖެއަށް ޒިޔާރަތް ކުރި ފަތުރުވެރިންގެ އަދަދާއެކު މި މަސް ވެގެން މި ދަނީ އެންމެ ގިނަ ފަތުރުވެރިން ޒިޔާރަތް ކުރި މަސްތަކުން ދެވަނަ މަހުގެ ގޮތުގައެވެ.
ވޭތުވެ ދިޔަ ދެ އަހަރުގެ ތަފާސްހިސާބަށް ބަލާ އިރު، ޑިސެމްބަރު މަހަކީ އެންމެ ގިނަ ފަތުރުވެރިން އަންނަ މަހެވެ. ނަމަވެސް މިއަހަރު ތެރޭ އެންމެ ގިނަ ފަތުރުވެރިން އައިސްފައި ވަނީ ފެބްރުއަރީ މަހުއެވެ. އެއީ 217،392 ފަތުރުވެރިންނެވެ.
ޓޫރިޒަމް މިނިސްޓްރީން އާންމު ކުރި ތަފާސްހިސާބަށް ބަލާއިރު، މި މަހުގެ 30 ވަނަ ދުވަހުގެ ނިޔަލަށް މި އަހަރުތެރޭ ރާއްޖެއަށް ވަނީ ޖުމްލަ 2،041،891 ފަތުރުވެރިން ޒިޔާރަތްކޮށްފައެވެ. މިދިޔަ އަހަރުތެރޭ މި މުއްދަތުގައި ރާއްޖެއަށް ވަނީ 1،872،645 ފަތުރުވެރިން އައިސްފައެވެ. 2022 ވަނަ އަހަރު ތެރޭ މި މުއްދަތުގައި ވަނީ 1،670،559 ފަތުރުވެރިން އައިސްފައެވެ.
ޑިސެމްބަރު މަހުގެ 30 ދުވަހުގެ ތަފާސްހިސާބަށް ބަލާއިރު، ޖުމްލަ 203،891 ފަތުރުވެރިން އައިސް ވަނީ އައިސްފައެވެ. މިދިޔަ އަހަރު ޑިސެމްބަރު މަހުގެ އެ މުއްދަތުގައި 188،798 ފަތުރުވެރިން އަދި 2022 ގެ އެ މުއްދަތުގައި 179،307 ފަތުރުވެރިން ވަނީ އައިސްފައެވެ.
މިދިޔަ ދެ އަހަރުގެ ތަފާސްހިސާބަށް ބަލާއިރު އެންމެ ގިނަ ފަތުރުވެރިން އައި މަސް ޑިސެމްބަރަށް ވެފައި ވީ ނަމަވެސް މި އަހަރު އެ ރެކޯޑް ހޯދާފައި މިވަނީ ފެބްރުއަރީ މަހެވެ. އަދި މި އަހަރު ތެރޭ އެންމެ ގިނަ ފަތުރުވެރިން އައި ދުވަހުގެ ރިކޯޑު މުގުރާލާފައި ވަނީ، 10،213 ފަތުރުވެރިން ރާއްޖެއަށް އައި ފެބްރުއަރީ 10 ވަނަ ދުވަހެވެ. މި އަހަރު ނިމެން ބާކީ އެއް ދުވަސް އޮތް އިރު ފެބްރުއަރީ މަހުގެ ރެކޯޑް މުގުރާލެވޭނެ ކަމަކަށް ނުބެލެވެއެވެ.
ޑިސެމްބަރު މަހަށް ބަލާއިރު، އެންމެ ގިނަ ފަތުރުވެރިން އައިސްފައި ވަނީ މި މަހުގެ 22، 28 އަދި 29 އެވެ. 22 ވަނަ ދުވަހު 9181 ފަތުރުވެރިން، 28 ވަނަ ދުވަހު 9440 ފަތުރުވެރިން އަދި 29 ވަނަ ދުވަހު 9386 ފަތުރުވެރިން ވަނީ އައިސްފައެވެ.
ފެބްރުއަރީ މަހުގެ ރެކޯޑް މުގުރާލާ ނަމަ އެއް ދުވަސްތެރޭ 14000 ފަތުރުވެރިން އައިސްގެން ނޫނީ އެ ރެކޯޑް މުގުރާލެވޭކަށް ނެތެވެ. މީގެކުރީގެ އަހަރުތަކުގައި އެންމެ ގިނަ ފަތުރުވެރިން އަންނަ މަސް މި އަހަރު ދެވަނަ އަށް ވެއްޓިގެން ދިޔަ ނަމަވެސް އަންނަ ޖެނުއަރީ މަހާއި ފެބްރުއަރީ މަހު ގިނަ އަދަދަކަށް ފަތުރުވެރިން އަންނާނެ ކަމަށް ބެލެވެއެވެ.
މިހާތަނަށް އެންމެ ގިނަ ފަތުރުވެރިން ރާއްޖެއަށް ޒިޔާރާތް ކޮށްފައި ވަނީ ޗައިނާއިންނެވެ. އެގައުމުން 263،042 ފަތުރުވެރިން ރާއްޖެ އައިސްފައިވާ އިރު އެންމެ ގިނަ ފަތުރުވެރިން އައި ލިސްޓުގެ ދެވަނައިގައި އޮތީ 224،699 ފަތުރުވެރިންނާއެކު ރަޝިއާއެވެ. އަދި ޔޫކޭ ވަނީ 180،455 ފަތުރުވެރިންނާ އެކު އެ ލިސްޓުގެ ތިން ވަނައިގައެވެ. މިދިޔަ އަހަރު އެންމެ ގިނަ ފަތުރުވެރިން ރާއްޖެއަށް ޒިޔާރަތް ކުރި އިންޑިއާ އޮތީ 130،328 ފަތުރުވެރިންނާއެކު މި ލިސްޓުގެ ހަ ވަނައިގައެވެ.
