ޑިވެލޮޕްމަންޓް ކޯޕަރޭޝަން (އާރްޑީސީ) ގެ ކުރީގެ މެނޭޖިން ޑިރެކްޓަރު މޫސާ އަލިމަނިކު (މޫކޭ) ގެ ކިބައިގައި ދިގު މުއްދަތަކަށް ރާއްޖޭން ބޭރުގައި ދިރިއުޅެވޭނެ ވަރުގެ ތަނަވަސްކަން އެބަހުރިކަމަށް ފުލުހުން ބުނެފިއެވެ.
މޫކޭގެ ޕާސްޕޯޓް ހިފަހައްޓަން ކްރިމިނަލް ކޯޓުން ނެރެފައިވާ އަމުރުގައި ބުނެފައިވަނީ އޭނާއަކީ ދިގު މުއްދަތަކަށް ރާއްޖޭން ބޭރުގައި ދިރިއުޅުމުގެ މާލީ ތަނަވަސްކަން ހުރި މީހެއް ކަމަށެވެ. އެހެންވެ އޭނާ ފުރައިގެން ގޮސްފިނަމަ، ތަހުގީގަށް ހެކި ހޯދަން ހުރަސް އެޅޭނެ ކަމަށް ފުލުހުން ވަނީ ބުނެފައެވެ.
މި މައްސަލައިގެ ހެއްކެއްގެ ގޮތުގައި ފުލުހުން އިންޓެލިޖެންސް ރިޕޯޓެއް ހުށަހަޅާފައިވާއިރު، މި އަމުރާއި ގުޅިގެން މޫކޭ ބުނީ މިއީ އެއްވެސް ހެއްކެއް ނެތި ހުށަހަޅާފައިވާ އިންޓެލިޖެންސް ރިޕޯޓެއް ކަމަށެވެ. އަދި އެއްވެސް ތަނަކަށް ފުރާކަށް ޓިކެޓެއް ނެގާފައި ނެތްކަމަށާއި އިންޓެލިޖެންސް ރިޕޯޓްގެ މައްޗަށް ހައްޔަރުކޮށް ހުކުމެއްވެސް ނެރެލަން ފެންނަކަމަށެވެ.
މޫކޭގެ އިތުރުން އާރުޑީސީގެ ކުރީގެ ޗީފް ފައިނޭންޝަލް އޮފިސަރު (ސީއެފްއޯ) ޔާސިރު ހަސަންގެ ޕާސްޕޯޓްވެސް ފުލުހުން ހިފަހައްޓާފައިވާއިރު، ބުރާސްފަތި ދުވަހުގެ ރޭ ފުލުހުން ވަނީ ކޯޓު އަމުރެއްގެ ދަށުން މޫކޭގެ އެޕާޓްމަންޓަކާއި އޭނާގެ އަންހެނުންގެ އެޕާޓްމަންޓެއްގެ އިތުރުން ޔާސީންގެ އެޕާޓްމަންޓެއްވެސް ބަލާފައެވެ.
