ކިތަންމެ އަގީދާ ވަރުގަދަ މީހަކު ވެސް މާޔޫސްކަމުގެ ތެރެއަށް ވެއްޓި ހިނގައިދާނެ ކަމަށާއި އެ ކަން ވަނީ އަގީދާ ބަލިކަށިވުމުން ނޫން ކަމަށް، މިއަދުގެ ހުކުރު ހުތުބާގައި ބުނެފިއެވެ.
މިއަދުގެ ހުތުބާގައި ބުނީ، ދިރިއުޅުމުގައި ހިތްދަތި ކަންކަމާއި ހިތާމަތަކާއި އުނދަގޫތައް ހިމެނޭ ކަމަށާއި، އުނދަގުލަށް ފަހު ފަސޭހަކަން އަންނާނެ ކަމަށެވެ. އެއާއެކު ހިތްދަތި ކަންކަމުން އަރައިގަތުމަށް އަޒުމާ އެކު މަސައްކަތްކުރުމަށް ހުތުބާގައި ބާރުއަޅާފައި ވެއެވެ.
އިންސާނާގެ ނަފްސު މާޔޫސްކަމުން ސަލާމަތްވުމަށްޓަކައި އަގީދާގައި ސާބިތުވުން މުހިންމު ކަމަށާއި، އެގޮތުން ޝައިތާނާގެ ވަސްވާސްތަކުގެ ޝިކާރައަކަށް ނުވެ، ވަރުގަދަ އަޒުމަކާ އެކު ސަލާމަތުގެ އައްސޭރިއަށް ވާސިލްވެވިދާނެ ކަމަށް މިއަދުގެ ހުކުރު ހުތުބާގައި ބުންޏެވެ.
އެކަމަކު ދިރިއުޅުމުގައި ދިމާވާ ދަތިތަކަށް ފަހު ބައެއް މީހުން އުންމީދު ކަނޑާލާ ކަމަށާއި ބައެއް މީހުން ނާއުންމީދުގެ ބަސްތައް ތަކުރާރުކުރާ ކަމަށް ވެސް ހުތުބާގައި ބުންޏެވެ.
މީގެ އިތުރުން، މާޔޫސްކަމުން ސަލާމަތްވުމަށްޓަކައި ހުތުބާގައި ބައެއް ކަންކަމަށް އިރުޝާދުދީފައި ވެއެވެ. އެ ކަންކަމަކީ:
- މާތް ﷲ އާ ވަކީލުކުރުމަށް
- ހެޔޮލަފާ މީހުންގެ ވާހަކަތައް އަޑުއަހައި އެ މީހުންގެ ނަސޭހަތްތަކުން ފައިދާ ހޯދުމަށް
- ކީރިތި ޤުރުއާނާ މެދު ވިސްނާ ފިކުރުކޮށް ޤުރުއާން ކިޔެވުމަށް
- ދުވާލުގެ ވަގުތުތަކުގައި ޒިކުރުކުރުމަށް
