ޑާކްރެއިން އެންޓަޓެއިންމަންޓުން ގެންނަން ތާވަލްކޮށްފައިވާ ވެބް ސީރީޒް "ރޯލީމޭ" ގެ ރަސްމީ ޓްރެއިލާ އާންމުކޮށްފިއެވެ.
މީޑިއާނެޓް ގެ އެމްސްޓީވީގައި ސްޓްރީމްކުރުމަށް ހަމަޖެހިފައިވާ މި ވެބް ސީރީޒްގެ ފުރަތަމަ އެޕިސޯޑެއް ބެލުންތެރިންނާ ހަމައަށް އަންނާނީ މި މަހުގެ 30 ވަނަ ދުވަހުއެވެ. އަސަރު ގަދަ ލޯބީގެ ވާހަކައަކަށް ބިނާކޮށް އުފައްދާފައިވާ މި ސީރީޒަކީ ޑާކް ރެއިން އެންޓަޓައިންމަންޓާއި މީޑިއާނެޓް ގުޅިގެން ގެނެސްދޭ ސީރީޒެކެވެ. މި ސީރީޒަކީ ޑާކް ރެއިނުން އޮކްޓޯބަރުގައި ގެނެސްދިން ހޮރޯ-ކޮމެޑީ "ބިބީ" ލިޔެ، ޑައިރެކްޓްކުރި ޝަހުދާ މަހުމޫދުގެ ސްކްރީންޕްލޭއަކަށް އަލީ ޝިފާއު (ޗިއްޕެ) ޑައިރެކްޓްކޮށްފައިވާ ސީރީޒެއްވެސް މެއެވެ. ސީރީޒުގައި ޖުމްލަ 15 އެޕިސޯޑެ ހިމެނޭނެއެވެ.
"ރޯލީމޭ" ގައި ހަރަކާތްތެރިވާނެ ތަރިންނަކީ ޝަރަފު އަބްދުﷲ، މަރިޔަމް މަޖުދާ (މަޖޫ)، މޫސާ އަލީފް، ނުޒުހަތު ޝުއައިބް (ނުޒޫ)، ރޯނު ހަސަން މަނިކު، އައިމިނަތު ޝުހާ، ޝީލާ ނަޖީބް އަދި މަރިޔަމް ހަލީމް އެވެ. މީގެ ކުރިންވެސް ޑާކްރެއިނުން ވަނީ ވެބް ސީރީޒް ބެލުންތެރިންނާ ހަމައަށް ގެނެސްދީފައެވެ. އެ ފިލްމު ކުންފުނިން އެންމެ ފަަހުން ބެލުންތެރިންނާ ހަމައަށް ގެނެސްދިން ފީޗާ ފިލްމަކީ "ބިބީ" އެވެ. އެ ފިލްމަކީ ހޮރޯ ކޮމެޑީ ޖޯންރާ އަށް ބިނާކޮށް އުފައްދާފައިވާ ފިލްމެކެވެ. އެ ފިލްމު ވަނީ ރާއްޖެތެރޭގެ އިތުރުން ރާއްޖެއިން ބޭރުގެ ބައެއް ގައުމުތަކުގައި ވެސް އަޅުވާފައެވެ.
