މިއަހަރުގެ ފަތުރުވެރިކަމުގެ ސިނާއަތުގެ އަމާޒުގެ ތެރެއިން ދެ މިލިއަން ފަތުރުވެރިން އަންނާނެ ކަމަށް ލަފާ ކޮށްފައިވާ އިރު އެ އަމާޒު ހާސިލް ވާނެ ތާރީހަކީ އަންނަ ބުރާސްފަތި ދުވަސް ކަމަށް ޓޫރިޒަމް މިނިސްތްރީން ބުނެފިއެވެ.
މިކަން ހާމަކޮށްފައި ވަނީ ރޭ ޕީއެންސީން ކުރިއަށް ގެންދިޔަ ޖަލްސާގައި ޓޫރިޒަމް މިނިސްޓްރީގެ ސްޓޭޓް މިނިސްޓަރު މުހައްމަދު ނިހާދު ދެއްކެވި ވާހަކައިގައެވެ. އެ އަމާޒު ހާސިލް ވާނީ އަންނަ ބުރާސްފަތި ދުވަހު ކަމަށް ނިހާދު ވަނީ ފާހަގަ ކުރައްވާފައެވެ.
ރާއްޖެއަށް ފަތުރުވެރިން ޒިޔާރަތްކުރި އަދަދަށް ބަލާއިރު މިއީ ތާރީހީ އަހަރެއްގެ ގޮތުގައި ފާހަކޮށްލެވެއެވެ. 2013 ވަނަ އަހަރުން ފެށިގެން މި އަހަރާ ހަމައަށް ބަލާއިރު ރާއްޖެއަށް ފަތުރުވެރިން ޒިޔާރަތްކުރާ އަދަދު އެއް އަހަރުން އަނެއް އަހަރަށް އިތުރުވަމުން އައިސް މިއީ ދެ މިލިއަން ފަތުރުވެރިން ރާއްޖެއަސް ޒިޔާރަތް ކުރާ ފުރަތަމަ ފަހަރެވެ. 2013 ވަނަ އަހަރު 1.1 މިލިއަން ފަތުރުވެރިން ރާއްޖެއަށް އައިސްފައިވާ އިރު 2019 ވަނަ އަހަރު ރާއްޖެއަށް ވަނީ 1.7 މިލިއަން ފަތުރުވެރިން އައިސްފައެވެ.
އެއަށް ފަހު މުޅި ދުނިޔެއަށް ދިމާވި ކޮވިޑްގެ ބަލިމަޑުކަމުގެ ތެރޭގައި 2020 ވަނަ އަހަރު ރާއްޖެއަށް އައި ފަތުރުވެރިންގެ އަދަދު ވަނީ 5 ލައްކައަށް ދަށްވެފައެވެ. ނަމަވެސް ރާއްޖޭގެ އިގްތިސޯދަށް އައި ހީނަރުކަމުން އަރައިގަތުމަށް ކުރަނަށް ފެށި މަސައްކަތާއެކު 2021 ވަނަ އަހރު ފަތުރުވެރިން އައި އަދަދު ވަނީ 1.3 މިލިއަނަށް އަރާފައެވެ. އެއަށް ފަހު 2022 ގައި އެ އަދަދު 1.3 މިލިއަނަށް، 2023 ގައި އެ އަދަދު 1.7 މިލިއަނަށް ވަނީ އަރާފައެވެ.
މިނިސްޓްރީން އާންމުކުރި އެންމެ ފަހުގެ ތަފާސްހިސާބު ތަކުން ދައްކާ ގޮތުގައި މި މަހުގެ 23 ވަނަ ދުވަހުގެ ނިޔަލަށް ރާއްޖެއަށް ވަނީ ޖުމްލަ 1،985،800 ފަތުރުވެރިން އައިސްފައެވެ. މިދިޔަ އަހަރު މި މުއްދަތާ ހަމައަށް ރާއްޖެއަށް އައިސްފައި ވާ ފަތުރުވެރިންގެ އަދަދަކީ 1،821،339 ކަމަށްވާ އިރު، 2022 ވަނަ އަހަރު މި މުއްދަތުގައި ވަނީ 1،620،215 ފަތުރުވެރިން އައިސްފައެވެ.
މި މަހުގެ 23 ދުވަހު ޖުމްލަ 148،165 ފަތުރުވެރިން އައިސްފައިވާ އިރު، މިދިޔަ މަހު ވަނީ 172،621 ފަތުރުވެރިން އައިސްފައެވެ. މުޅި އަހަރަށް ބަލާއިރު އެންމެ ގިނަ ފަތުރުވެރިން އައިސްފައި ވަނީ އަހަރުގެ ފުރަތަމަ ދެ މަހުއެވެ. އެގޮތުން ޖެނުއަރީ މަހު 192،385 ފަތުރުވެރިން އައިސްފައިވާ އިރު، ފެބްރުއަރީ މަހު ވަނީ 217،392 ފަތުރުވެރިން އައިސްފައެވެ.
ރާއްޖޭގައި މިވަގުތު އޮޕަރޭޝަނަލް ހާލަތުގައި 63،190 އެނދު ހުރިއިރު އޭގެތެރޭގައި 183 ރިސޯޓުގައި ހުރި 44،689 އެނދު، 939 ހޮޓާ އަދި ގެސްޓްހައުސްގައި 17،591 އެނދު އަދި 155 ސަފާރީ އުޅަނދުފަހަރުގައި ހުރި 3052 އެނދު ހިމެނެއެވެ.
މި އަހަރު ތެރޭ އެންމެ ގިނަ ފަތުރުވެރިން އައި ރިކޯޑު މުގުރާލާފައި ވަނީ، 10،213 ފަތުރުވެރިން ރާއްޖެއަށް އައި ފެބްރުއަރީ 10 ވަނަ ދުވަހެވެ. މި މަހުގެ ތެރޭގައި އެންމެ ގިނަ ފަތުރުވެރިން އައިސްފައި ވަނީ މި މަހުގެ 22 ވަނަ ދުވަހު، އެއީ 9181 ފަތުރުވެރިންނެެވެ.
މިހާތަނަށް އެންމެ ގިނަ ފަތުރުވެރިން ރާއްޖެއަށް ޒިޔާރާތް ކޮށްފައި ވަނީ ޗައިނާއިންނެވެ. އެގައުމުން 261،626 ފަތުރުވެރިން ރާއްޖެ އައިސްފައިވާ އިރު އެންމެ ގިނަ ފަތުރުވެރިން އައި ލިސްޓުގެ ދެވަނައިގައި އޮތީ 217،197 ފަތުރުވެރިންނާއެކު ރަޝިއާއެވެ. އަދި ޔޫކޭ ވަނީ 175،646 ފަތުރުވެރިންނާ އެކު އެ ލިސްޓުގެ ތިން ވަނައިގައެވެ. މިދިޔަ އަހަރު އެންމެ ގިނަ ފަތުރުވެރިން ރާއްޖެއަށް ޒިޔާރަތްކުރި އިންޑިއާ އޮތީ 127،125 ފަތުރުވެރިންނާއެކު މި ލިސްޓުގެ ހަ ވަނައިގައެވެ.
ރާއްޖެއަށް އައި ފަތުރުވެރިންގެ ލިސްޓުގެ އެއްވަނައިގައި ޗައިނާ އޮތް އިރު، ޓޫރިޒަމް މިނިސްޓްރީން އަންނަނީ ޗައިނާ މާކެޓްގައި ރާއްޖެ އިސްތިހާރު ކުރުމަށް ގިނަގުނަ މަސައްކަތްތައް ކުރަމުންނެވެ. ކޮވިޑަށް ފަހު ރާއްޖެއަށް ޗައިނާ ފަތުރުވެރިން އަންނަން ފެށި ފަހުން ޗައިނާ ފަތުރުވެރިން އަންނަ އަދަދު އިތުރުވެ، މި އަހަރުތެރޭ ޗައިނާ މާކެޓް މި ވަނީ ލިސްޓްގެ އެއްވަނަގައި ހިފަހައްޓާފައެވެ. ހަމައެއާއެކު މި ސަރުކާރުން އަންނަނީ އިންޑިއާއިން ރާއްޖެއަށް އަންނަ ފަތުރުވެރިން ވެސް އިތުރު ކުރުމަށް މަސައްކަތް ފަށާފައެވެ. އެގޮތުން ރުޕޭ ކާޑާއެކު އިންޑިއާގެ ފަތުރުވެރިންނަށް ރާއްޖޭގައި ފަސޭހަކަމާއެކު ފައިސާގެ މުއާމަލާތް ކުރެވޭނެ އިންތިޒާމް ވަނީ ހަމަޖައްސާފައެވެ.
