ފުވައްމުލަކު ސިޓީ ކައިރީ ކަނޑުމަތިން ސޯމާލިޔާ 3 މީހަކު ތިބި ޑިންގީއެއް ފެނި އެ ޑިންގީ އެމްއެންޑީއެފްގެ ބެލުމުގެ ދަށަށް ގެންގޮސްފިއެވެ.
އެމްއެންޑީއެފް އިން ބުނީ، މި ޑިންގީ ފެނިފައި ވަނީ ފުވައްމުލަކު ސިޓީ ހުޅަނގު އުތުރުން 10 ވަރަކަށް މޭލު ބޭރުން ކަމަށެވެ. މި މައުލޫމާތު ލިބުމާއެކު އެމްއެންޑީއެފް ސަދަން އޭރިއާ ކޮމާންޑްގެ ކޯސްޓްގާޑުން އެސަރަހައްދަށް ގޮސް އެ ޑިންގީ އެމްއެންޑީއެފްގެ ބެލުމުގެ ދަށަށް ގެންގޮސްފައިވާ ކަމަށް އެމްއެންޑިއެފް އިން ބުނެއެވެ.
މި ޑިންގީއަކީ ސޯމާލިއާގެ މީހުން ބޭނުންކުރާ ވައްތަރުގެ "ސްކިފް" އެއް ކަމަށާއި މި ޑިންގީގައި ސޯމާލިއާ މީހުން ކަމަށް ޝައްކު ކުރެވޭ 3 މީހުން ތިބި ކަމަށް އެމްއެންޑީއެފް އިން ބުނެއެވެ.
ފުވައްމުލަކު ސިޓީ ބަނދަރަށް މި ޑިންގީ ވައްދާފައިވާ ކަމަށާއި، އެ ޑިންގީ ޕޮލިހުންނާ ހަވާލުކުރުމުގެ މަސައްކަތް ކުރަމުން ދާކަމަށް ވެސް އެމްއެންޑީއެފް އިން ވަނީ ބުނެފައެވެ.
މި އަހަރުގެ ޖޫން މަހުގެ ތެރޭގައި ވެސް ޑިންގީއާއެކު ރާއްޖޭގެ ފަޅުރަށެއް ކަމަށްވާ ނ. ވަވަތިއަށް ސޯމާލިޔާގެ ބަޔަކު ލައްގާފައި ވެއެވެ.
އިރުމަތީ އެފްރިކާއަށް ނިސްބަތްވާ ސޯމާލިއާއަކީ ފަގީރުންގެ ނިސްބަތް ވަރަށް ގިނަ ގައުމެކެވެ. އަދި އެމީހުން އެއް ގައުމުން އަނެއް ގައުމަށް ހިޖުރަ ކުރުމަށް ޑިންގީ ފަދަ ތަކެތި ބޭނުން ކުރާކަން ފާހަގަކޮށް ލެވެއެވެ.
