ދިރުވާލައިގެން 1 ކިލޯއަށް ވުރެ ގިނަ މަސްތުވާތަކެތި އެތެރެކުރި ބްރެޒިލް މީހަކާއި އެތަކެއްޗާ ހަވާލުވާން ދިޔަ ދިވެއްސަކު ހައްޔަރު ކޮށްފިއެވެ،
މި މައްސަލައާ ގުޅިގެން ހައްޔަރު ކުރި އުމުރުން 44 އަހަރުގެ ބްރެޒިލް ފިރިހެން މީހާ އަދި 39 އަހަރުގެ ދިވެހި ފިރިހެން މީހާގެ ބަންދަށް ކްރިމިނަލް ކޯޓުން ވަނީ 5 ދުވަހުގެ މުއްދަތެއް ޖަހާފައެވެ.
ކޯޓު އަމުރުގައި ފާހަގަކޮށްފައިވާ ގޮތުގައި ހަށިގަނޑުގައި މަސްތުވާތަކެތި ރައްކާކޮށްގެން ދިވެހިރާއްޖެއަށް އެތެރެކުރި ކަމަށް ތުހުމަތު ކުރެވޭ މި މައްސަލައާ ގުޅިގެން ބްރެޒިލް މީހާ ހައްޔަރުކޮށްފައި ވާއިރު، މަސްތުވާތަކެތި ކަމަށް ޝައްކު ކުރެވޭ 107 ބުލެޓް ފެނިފައި ވެއެވެ. މި ތަކެތީގެ ވަގުތީ ބަރުދަނުގައި 1 ކިލޯއަށްވުރެ މައްޗަށް އަރާ ކަމަށް ފުލުހުންނާ ހަވާލާދީ ކޯޓު އަމުރުގައި ބުނެފައި ވެއެވެ.
ބްރެޒިލް މީހާގެ މައްޗަށް ތުހުމަތު ކުރަނީ ޖިނާއީ އިޖުރާއަތުގެ ގާނޫނުގެ 22 ވަނަ މާއްދާގައި ބަޔާންކޮށްފައިވާ ބޮޑު ކުށެއްގެ ތުހުމަތެވެ. އަދި މީނާގެ ފަރާތުން ތަހުގީގަށް ދޭންޖެހޭ އެންމެހައި އެއްބާރުލުން ދެމުންދާކަމަށް ވެސް ކޯޓު އަމުރުގައި ފާހަގަކޮށްފައިވެއެވެ.
މި މައްސަލައާ ގުޅިގެން ފުލުހުން ހިންގި ކޮންޓްރޯލް ޑެލިވަރީ އޮޕަރޭޝަނެއްގައި އެތަކެއްޗާ ހަވާލުވާން އައިކަމުގެ ތުހުމަތުގައި ދިވެއްސަކު ހައްޔަރުކޮށްފައި ވާއިރު، މިއީ ރޭވިގެން ޖަމާއަތް ހަދައިގެން ހިންގާފައިވާ އަމަލެއް ކަމަށް ބެލެވޭކަން ކޯޓު އަމުރުގައި ފާހަގަކޮށްފައިވެއެވެ.
