ދައުލަތުން އަންނަ އަހަރަށް ލަފާކޮށް ހުށަހަޅާފައިވާ ބަޖެޓުގެ ކޮމިޓީ މަރުހަލާގެ ހުރިހާ މަސައްކަތްތަކެއް، މި ހިނގާ ނޮވެމްބަރު މަހުގެ 19 ވަނަ ދުވަހުގެ ނިޔަލަށް އެއްކޮށް ނިންމާލުމަށް ރައްޔިތުންގެ މަޖިލީހުގެ ބަޖެޓު ދިރާސާކުރާ ކޮމިޓީން ތާވަލު އެކުލަވާލައިފިއެވެ.
މަޖިލީހުގެ ނައިބު ރައީސް އަހުމަދު ސަލީމް ރިޔާސަތު ބަލަހައްޓަވާ މި ކޮމިޓީގެ މިއަދުގެ ބައްދަލުވުމުގައި ވަނީ، ބަޖެޓާ ގުޅޭގޮތުން ސަރުކާރާއި ދައުލަތުގެ މުހިންމު އިދާރާތަކާ ބައްދަލުކުރާނެ އިންތިޒާމުތައް ހަމަޖައްސާފައެވެ. އެގޮތުން، ބަޖެޓުގެ ތަފުސީލުތައް އޮޅުންފިލުވައި ސުވާލުކުރުމަށް ފިނޭންސް މިނިސްޓްރީގެ އިސް ވެރިން ކޮމިޓީއަށް ހާޒިރުކުރަން ވަނީ ނިންމާފައެވެ. މީގެއިތުރުން، މަޖިލީހުގެ ގަވާއިދު ލާޒިމުކުރާ ގޮތުގެ މަތިން މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަދި އޮޑިޓާ ޖެނެރަލްގެ ފަންނީ ލަފަޔާއި ހިޔާލު ހޯދުމަށް ބާއްވާ ބައްދަލުވުންތަކުގެ މަޝްވަރާތައް ކުރިއަށްގެންދިއުމަށް ނިންމާފައިވެއެވެ.
މީގެއިތުރުން މިނިވަން މުއައްސަސާތަކުން ބަޖެޓާ މެދު ދެކޭގޮތް ލިޔުމުން ހޯދުމަށްފަހު، ހާޒިރުކުރާނެ ވަކިވަކި މުއައްސަސާތައް ކަނޑައެޅުމުގެ އިހުތިޔާރު މަޖިލީހުގެ އިދާރީ މޭޒަށް ދިނުމަށް ފޮނަދޫ ދާއިރާގެ މެންބަރު މުހައްމަދު މަމްދޫހު ހުށަހެޅުއްވި ހުށަހެޅުންވެސް ކޮމިޓީން ފާސްކުރިއެވެ. ނަމަވެސް، މިނިވަން މުއައްސަސާތަކުގެ އަޑު އެއްސެވުމުގެ ފުރުސަތު ހަނިވެގެން ހިނގައިދާނެތީ، ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވަނީ އެ ފަރާތްތަކަށް ކޮމިޓީއަށް ހާޒިރުވެ ހިޔާލު ފާޅުކުރުމުގެ ދޮރު ބަންދުނުކުރުމަށް އެދިވަޑައިގެންފައެވެ. މެންބަރުންގެ މި ކަންބޮޑުވުމަށް ރިއާޔަތްކުރައްވައި ކޮމިޓީގެ މުގައްރިރު ސަލީމް ވިދާޅުވީ، އިދާރާތަކުން ފޮނުވާ ލިޔެކިޔުންތައް ދިރާސާކުރުމަށްފަހު، ކޮމިޓީން ބައްދަލުކުރަން ބޭނުންވާ ފަރާތްތައް ހާޒިރުކޮށްގެން ސުވާލުކުރުމުގެ ފުރުސަތު އޮންނާނެ ކަމަށެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން އަންނަ އަހަރަށް ލަފާކޮށް މަޖިލީހަށް ހުށަހަޅާފައިވަނީ ޖުމްލަ 59.7 ބިލިއަން ރުފިޔާގެ ބަޖެޓެކެވެ. މިދިޔަ އޮކްޓޯބަރު މަހުގެ 29 ގައި ފިނޭންސް މިނިސްޓަރު ހަސަން ޒަރީރު ހުށަހެޅުއްވި މި ބަޖެޓުގައި އެންމެ ބޮޑު ހޭދައެއް ކަނޑައަޅާފައިވަނީ ސިއްހީ ދާއިރާއަށާއި އިގްތިސޯދީ ހަރަކާތްތައް ފުޅާކުރުމަށެވެ. އަދި މި ބަޖެޓުގެ މައިގަނޑު އަމާޒަކީ ސަރުކާރުން ވެފައިވާ ވައުދުތަކާ ގުޅޭ މަޝްރޫއުތައް ނިންމައި، ރާއްޖޭގެ ދަރަންޏާއި ދައުލަތުގެ މާލީ ހާލަތު ދެމެހެއްޓެނިވި އިގްތިސޯދީ މިންގަނޑަކަށް ގެނައުމެވެ.
