ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދު އިސްތިއުފާ ދެއްވުމާ ގުޅިގެން އެ މަގާމަށް ކުރީގެ ކޮންސްޓްރަކްޝަން މިނިސްޓަރު މައުރޫފް ޖަމީލް އައްޔަން ކޮށްފިއެވެ.
ޕީސީބީ އިން އެކްސްގައި ކުރި ޕޯސްޓެއްގައި ބުނެފައިވަނީ އެޗްޑީސީގެ އެމްޑީގެ މަގާމު އަދި ޑިރެކްޓަރުންގެ ބޯޑުގެ މެންބަރު ކަމުގެ މަގާމަށް މ. ދޫރެސް މުހައްމަދު މައުރޫފް ޖަމީލު މިއަދު އައްޔަން ކޮށްފައި ވާކަމަށާއި، ފަޒުލް ރަޝީދު އިސްތިއުފާ ދެއްވުމަށް ހުށަހަޅުއްވާފައި ވާތީ، އޭނާގެ އިސްތިއުފާ ގަބޫލުކޮށް މިއަދުން ފެށިގެން އެމަގާމުން އޭނާ ވަކިކޮށްފައިވާ ކަމަށެވެ.
މި މަގާމުން އިސްތިއުފާ ދެއްވަމުން ފަޒުލް ވިދާޅުވީ ބިންވެރިޔާ ސްކީމާ ގުޅިގެން ކުންފުންޏަށް އަމާޒުވެފައިވާ ތުހުމަތުތަކަކީ ކުންފުންޏާ އެއްވެސް ގުޅުމެއް ހުރި ކަންތައްތަކެއް ނޫންކަމަށާއި، އެދެނީ އެ ތުހުމަތު ތަކުގެ ހަގީގަތް ވީ އެންމެ އަވަހަކަށް ރައްޔިތުންނަށް ހާމަވުމަށް ކަމަށެވެ.
ފަޒުލް ވިދާޅުވީ މި ތަހުގީގަށް ފުރުސަތު ދިނުމުގެ ގޮތުންނާއި، ކުންފުންޏާއި ސަރުކާރުގެ ސިޔާސަތު ނުހުއްޓި ކުރިއަށް ގެންދިއުމަށް ފުރުސަތު ދިނުމުގެ ގޮތުން އެޗްޑީސީގެ މެނޭޖިން ޑިރެކްޓަރުގެ މަގާމުން އިސްތިއުފާ ދެއްވީ ކަމަށެވެ.
ފާހަގަކޮށްލެވޭ ގޮތުގައި ބިންވެރިޔާ ސްކީމަށް ޝަރުތު ހަމަނުވި ނަމަވެސް ގޯތި ލިބިފައިވާ މީހުންގެ ތެރޭގައި، ފަޒުލްގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ހިމެނޭ ކަމަށް ބުނާ ލިޔެކިޔުންތަކެއް ސޯޝަލް މީޑިއާގައި އާންމުވެފައި ވަނިކޮށް ފުލުހުން ވަނީ ފަޒުލް ރަޝީދަށް އަދި އެއްވެސް ތުހުމަތެއް މިހާތަނަށް ނުކުރެވޭ ކަމަށް ބުނެފައެވެ.
މި މައްސަލަ އާ ގުޅިގެން ފަޒުލް ރަޝީދު ސަސްޕެންޑްކޮށް އަދި ބޯޑުން ވެސް، އޭނާ ވަނީ ވަކިކޮށްފައެވެ.
