މާލެއަށް ކުރި ވިއްސާރައިގައި 8 ގޭބީސީއެއްގެ މީހުންނަށް ބޯހިޔާވަހިކަން ފޯރުކޮށްދީފައިވާ ކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.
އެންޑީއެމްއޭއިން ބުނީ މާލޭގައި ދިމާވި ފެންބޮޑުވުމުގެ ހާދިސާއާއި ގުޅިގެން ސިފައިންނާއި ފުލުހުންނާއި އެ އޮތޯރިޓީގެ ހޮޓްލައިނަށް 101 ރިޕޯޓު ލިބިފައިވާ ކަމަށެވެ. އޭގެ ތެރޭގައި އެންމެ ގިނަ ރިޕޯޓު ލިބިފައިވަނީ މާފަންނުން ކަމަށް އެ އޮތޯރިޓީން އާންމު ކުރި ތަފާސްހިސާބުތައް ދައްކައެވެ. އެގޮތުން މާފަންނުން 59 ރިޕޯޓު ލިބިފައިވާއިރު ހެންވޭރުން ވަނީ 17 ރިޕޯޓު ލިބިފައެވެ. އަދި ހަމައެހެންމެ ގަލޮޅުން 21 ރިޕޯޓު ލިބުން އިރު މައްޗަންގޮޅިން ލިބިފައިވަނީ 2 ރިޕޯޓު ކަމަށް ވެއެވެ.
އަދި ހަމައެހެނެމެ ފެން ވަނުން ކޮންޓްރޯލް ކުރުމަށް ސިފައިންނާއި މާލެ ސިޓީ ކައުންސިލްގެ އެހީތެރިކަމާއެކު 47 ތަނެއްގައި (ގޭގެއާއި ގުދަންތަކުގައި) 229 ވެލި ބަސްތާ ޖަހާފައިވާ ކަމަށެވެ.
އަދި މީގެ އިތުރުން ވަގުތުން އެހީތެރިކަން ބޭނުންވާ 12 ގޭބީސީއެއްގެ ރެޕިޑް އެސިސްމެންޓް ދިވެހި ރެޑްކްރެސެންޓުގެ އެހީތެރިކަމާއެކު ހަދާފައިވާ ކަމަށެވެ. ހަމައެހެންމެ 8 ގޭބީސީއެއްގެ 32 މީހުންނަށް އެއް ދުވަހުގެ މުއްދަތަަށް ވަގުތީ ބޯހިޔާވަހިކަމާއި ކެއިން ބުއިން ހަމަޖައްސައި ދީފައިވާ ކަމަށެވެ. އަދި އެ ފަރާތްތަކަށް ވަގުތީ ބޯހިޔާވަހިކަން ހަމަޖައްސާދީފައިވަނީ ކައްކާ ކައިބޮއި ހެދުމަށާއި ނިދާ ފަހާނާ ކުރެވޭނެ ގޮތެއް ނެތުމުގެ އިތުރުން ވަގުތީ ގޮތުން އެތަންތަނުގައި ދިރިއުޅޭނެ ހާލަތެއް ނެތުމުގެ ސަބަބުން ކަމަށް އެންޑީއެމް އިން ބުނެއެވެ.
މެޓް އޮފީހުން ބުނީ މިދިޔަ 24 ގަޑިއިރުގެ ތެރޭގައި އެންމެ ގިނައިން ވާރޭވެހުނީ މާލެއަށް ކަމަށާއި އެގޮތުން 136.5 މިލިލީޓަރުގެ ވާރޭ ވެހިފައިވާ ކަމަށެވެ. މީގެ އިތުރުންވެސް މެޓް އޮފީހުން ވަނީ ރާއްޖޭގެ އެކި ހިސާބުތަކަށް ބޯކޮށް ވާރޭ ވެހޭނެ ކަމަށް ލަފާކޮށްފައެވެ.
އަދި ބައެއް ރަށްތަކަށް ގުގުރުމާއެކު ބޯކޮށް ވާރޭވެހޭނެ ކަމަށް ވެސް ވަނީ ލަފާކޮށްފަ އެވެ. އެގޮތުން އުތުރުގެ އަތޮޅުތަކަށް ހުޅަނގާއި ހުޅަނގުއުތުރުން ގަޑިއަކު އަށް މޭލާއި 18 މޭލާ ދެމެދުގެ ބާރުމިނުގައި ވައިޖެހޭއިރު އެހެން ހިސާބުތަކަށް ހުޅަނގުދެކުނާއި ހުޅަނގުން ގަޑިއަކު 17 މޭލާއި 27 މޭލާ ދެމެދުގެ ބާރުމިނުގައި ވައިޖެހޭނެ ކަމަށް މެޓް އޮފީހުން ވަނީ ލަފާކޮށްފައެވެ. އަދި އަދި ވިލާގަނޑުގައި ގަޑިއަކު 50 މޭލަށް ވައި ގަދަވުން އެކަށީގެންވާ ކަމަށްވެސް އެ އޮފީހުން ވަނީ ލަފާކޮށްފައެވެ.
