ބިބެކް ޕަންގޭނީ އަކީ ސޯޝަލް މީޑިއާގައި މަޝްހޫރު ޝަހްސިއްޔަތެއްގެ އިތުރުން ފިޒިކްސް އަދި އެސްޓްރޮނޮމީގެ ދާއިރާއިން ޕީއެޗްޑީ ހާސިލްކޮށްފައިވާ މީހެކެވެ. އޭނާގެ ގިނަ ދުވަސްވީ ލޯބިވެރިޔާ ސްރިޖާނާ ސުބެދީ އާއި ކައިވެނި ކުރިއިރު، އެ ދެމަފިރިން ޓިކްޓޮކާއި އިންސްޓަގްރާމް ވީޑިއޯތައް ހިއްސާކޮށް ބެލުންތެރިންނަށް ވަނީ، އެ ދެމީހުން އެކަކު އަނެކަކަށް ކުރާ ލޯތްބާއި އިތުބާރު ދައްކާފައެވެ. މި ދެމަފިރިންގެ އުފާވެރި، ވީޑިއޯތަކާއި ދެމީހުންގެ މެދުގައި އޮތް ވަރުގަދަ ލޯބިވަނީ ފެނިގެންގޮސްފައެވެ.
2022 ވަނަ އަހަރު ސްރީޖާނާ އާއި ބިބެކް އެމެރިކާއަށް ބަދަލުވީ އަމިއްލަ ދިރިއުޅުމާއި ޕްރޮފެޝަނަލް ދިރިއުޅުމަށް ވެސް ރަނގަޅު ފުރުސަތުތަކެއް ފަހިވުމާއި ގުޅިގެންނެވެ. ނަމަވެސް ޕާކިންސަން ބައްޔާއި ދިގު ހަނގުރާމައެއް ކުރުމަށް ފަހު ބިބެކްގެ މަންމަ މަރުވުމާއި ގުޅިގެން އެމީހުން އެނބުރި ނޭޕާލަށް ދާން ޖެހުނެވެ. އޭގެ ކުޑަދުވަސްކޮޅެއް ފަހުން އަނެއްކާވެސް އެމީހުންގެ ހަޔާތަށް ކުރިމަތިވީ ހީވެސް ނުކުރާފަދަ މުސީބާތެކެވެ. ބިބެކްގެ ސިކުނޑީގެ ކުރިމަތީ ބައިގައި ޓިއުމަރެއް ހުރިކަން އެނގުން ވެގެންދިޔައީ އެ ދެމަފިރިންގެ ދިރިއުޅުމަށް އައި ބޮޑު ލޮޅުމަކަށެވެ. ބިބެކް، ވަގުތުން އެމެރިކާގެ ޕިއެޑްމޮންޓް އެތެންސް ރީޖަނަލް ހޮސްޕިޓަލުގައި އެޑްމިޓްކޮށް، ޓިއުމަރުގެ %50 ނައްތާލުމަށް ސާޖަރީއެއް ހެދިއެވެ.
ބިބެކް ދިރިއުޅުމުގައި ދިމާވި އެންމެ ބޮޑު އިމްތިހާނުގައި އޭނާ އާއި އެންމެ ގާތުގައި ހުރީ އަނބިމީހާ ސްރިޖާނާ ސުބެދީއެވެ. ކެންސަރުގެ ހަތަރުވަނަ ސްޓޭޖުގައި ފަރުވާ ހޯދަމުން ދިޔައިރު އޭނާގެ ކައިރީގައި ހުރި ސްރިޖާނާ، ދެމުންދިޔަ އެއްބާރުލުމާއި އެހީތެރިކަމަކީ ނަމޫނާއެވެ.ބިބެކްއަށް ފަރުވާގެ ހުރިހާ މަރުހަލާއެއްހައި އޭނާއަށް ކުރިމަތިވަމުން ދިޔަ ކަންތައްތކާ ސްރިޖާނާ ކުރިމަތިލި ހިތްވަރުން ދައްކުވައިދިނީ އެ ދެމީހުންގެ މެދުގައި އޮތް އާދަޔާ ހިލާފު ލޯބީގެ ގުޅުމެކެވެ. ނަމަވެސް ކެތްތެރިކަމެއް ނެތް މަސައްކަތާ، ފަސްޖެހުމެއް ނެތް ތާއިދާ، ނިމުމެއް ނެތް ލޯތްބާއި އެކުވެސް ބިބެކްގެ ހާލު ސީރިއަސްވެ ސިއްހީ ހާލަތު ގޯސްވަމުން ދިޔައެވެ. ބިބެކްގެ ހިތްވަރާއި އަނބިމީހާގެ ވަފާތެރިކަމާއި އެ ލޯތްބާއި، ކުލުނު ދޫކޮށް ޑިސެމްބަރު 19 ވަނަ ދުވަހު އޭނާ ކުރަމުން ދިޔަ ހަނގުރާމައިން ބަލިވިއެވެ. ބިބެކްގެ ވަކިވުމާއި އެކު ސޯޝަލް މީޑިއާގައި ތައުޒިޔާގެ މެސެޖުތަކާއި، އެ ދެމީހުންގެ ވީޑިއޯތަކުން މިސާލު ނަގަމުން އަންނައިރު އެންމެ ފަހު ވަގުތާއި ޖެހެންދެން ސްރިޖާނާ ދެއްކި ހިތްވަރަށް ތައުރީފު އަންނަނީ އޮހެމުންނެވެ.
ބިބެކް އާއި އަންހެނުން ސްރިޖާނާ، އޭނާގެ ފަރުވާގެ ތެރޭގައި އެމީހުންގެ އިންސްޕިރޭޝަނަލް ވީޑިއޯތައް ބެލުންތެރިންނަށް ދޫކޮށްލާފައިވާއިރު އެ ވީޑިއޯތަކައް އެތައް މިލިއަން މީހުން ވަނީ ބަލާފައެވެ. ބިބެކް ވަނީ ކެންސަރަށް ފަރުވާ ދިނުމުގެ ތަޖުރިބާ އޭނާގެ އިންސްޓަގްރާމް ރީލްތަކުގެ ތެރެއިން ހިއްސާކޮށް، ގިނަ ބަޔަކަށް އިންސްޕިރޭޝަނަކަށް ވެގެން ގޮސްފައެވެ. އޭގެ ތެރެއިން އެއް ވީޑިއޯގައި ސްރީޖާނާ ހާމަކޮށްފައިވާ ގޮތުގައި ޑޮކްޓަރުން ވަނީ ބިބެކް އަށް އަލްޓިމޭޓަމް ދީ، އޭނާއަށް ދިރިހުރުމަށް ހަ މަސް ދުވަސް އޮތް ކަމަށް އިއުލާންކޮށްފައެވެ. އަނެއް ވީޑިއޯއަކުން އޭނާގެ އަމިއްލަ ވަގުތުތަކާއި ފަރުވާގެ ތެރޭގައި ކުރިމަތިވާ އުނދަގޫތައް ދައްކުވައިދެއެވެ. ހަ އަހަރު ވަންދެން ރައްޓެހިވެގެން އުޅުމަށް ފަހު ކައިވެނި ކުރި މި ދެމަފިރިން ވަނީ އިންސްޓަގްރާމް ޕްލެޓްފޯމް ބޭނުންކޮށްގެން ބޮޑެތި ބަލިތަކާ ކުރިމަތިލާން ހޭލުންތެރިކޮށް، މިއަދުގެ މާއްދީ ދުނިޔޭގައި ހަގީގީ ލޯތްބަކީ މަދުން ނޫނީ ނުފެންނަ އަދި އަސަރުގަދަ މިސާލެއް ދައްކާލާފައެވެ.
