ބިންވެރިޔާ ސްކީމްގެ ދަށުން ޝަތުރު ހަމަނުވާ ފަރާތްތަކުގެ ތެރެއިން ތިން ފަރާތަކަށް ބިން ދޫކޮށް ލިޔުން ދީފައިވާ ކަމަށާއި މި ލިޔުންތައް ދޫކޮށްފައި ވަނީ މިދިޔަ ސަރުކާރުން ކަމަށް ފުލުހުން ބުނެފިއެވެ.
ބިންވެރިޔާ ސްކީމުގެ ދަށުން ގޯތި ނުލިބޭ ބަޔަކަށް ގޯތިިތަކެއް ދިން މައްސަލައާ ގުޅިގެން މިރޭ ފުލުހުން ބޭއްވި ނޫސްވެރިންގެ ބައްދަލުވުމުގައި ބުނީ، ސޯޝަލް މީޑިއާގައި އާންމުވި މި މައްސަލައާ ގުޅިގެން އެ ލިޔުމުގެ ސައްހަކަން ބަލަން މަސައްކަތް ކުރަމުން އަންނަ ކަަމަށެވެ. ސޯޝަލް މީޑިއާގައި ދައުރުވަމުން ދާ ލިޔުމަކީ އެޗްޑީސީގައި ވެސް އޮތް ލިޔުމެއް ކަން މިހާތަނަށް އެނގިފައިވާ ކަމަށެވެ.
ޕޯޓަލް މެދުވެރިކޮށް ލިޔުން ހޯދުމަށް ބިން ލިބުނު ފަރާތްތަކުން ހުށަހަޅަމުން އަންނަ އިރު މި ލޮޓްތަކުގެ މައްސަލައިގައި އިތުރު ކަންކަން ފާހަގަވި ކަމަށް ފުލުހުން ބުނެއެވެ. އެގޮތުން ބިންވެރިޔާ ސްކީމުގެ ދަށުން ޝަރުތު ހަމަނުވާ ފަރާތްތަކުގެ ތެރެއިން 3 ލޮޓެއްގެ މި ފަދަ މައްސަލައެއް ތަހުގީގުން ފާހަގަވެފައިވާ ކަމަށް ފުލުހުން ބުނެއެވެ. ބައެއް ލޮޓްތަކާ ގުޅިގެން އިމާރަތް ކުރުމުގެ ހުއްދަ ހޯދުމަށް ޕޯޓަލް މެދުވެރިކޮށް ލިޔުން ހުށަހަޅާފައި ވެއެވެ. ލިޔުން ހުށަހަޅާފައިވާ އިރު، އެއް ފަރާތަށް ވުރެ ގިނަ ފަރާތްތަކުގެ ނަމުގައި ލިޔުން ހުށަހަޅާފައިވާ ކަން ވެސް ފާހަގަވެފައިވާ ކަމަށް ފުލުހުން ބުނެއެވެ.
މި ހުއްދަތަކަށް އެދިފައިވާ އިރު، އެޗްޑީސީން ވަނީ ލިޔުންތަކަށް ޖަވާބު ދީފައި ކަމަށާއި އެއް ފަރާތްތައް ވުރެ ގިނަ ފަރާތްތަކުން ލިޔުން ހުށަހަޅާފައިވާ ކަން އެޗްޑީސީއަށް ފާހަގަވެގެން ހައުސިން މިނިސްޓްރީއާ އެކު މަޝްވަރާކޮށް މިކަން ބެލުމަށް މަސައްކަތް ކޮށްފައިވާ ކަން ފާހަގަ ވި ކަމަށް ފުލުހުން ބުނެއެވެ.
މި ލޮޓްތަކުގެ މައްސަލައާ ގުޅިގެން މިހާރު ކުރަމުންދާ ތަހުގީގުގައި 6 ފަރާތަކާ ސުވާލުކޮށްފައިވާ އިރު އޭގެތެރޭގައި އެޗްޑީސީގެ އެއްވެސް މުވައްޒަފެއް ނުހިމެނޭ ކަމަށް ފުލުހުން ބުނެއެވެ. ތަހުގީގު މިހާރު ކުރިއަށް ގެންގޮސްފައިވާ އިރު ފާހަގަ ކުރެވުނު ކަންކަމުން އިތުރަށް ތަހުގީގު ފުޅާ ކުރަން ޖެހިފައިވާ ކަމަށް ފުލުހުން ބުނެއެވެ. އެގޮތުން އެޗްޑީސީއާއި ހައުސިން މިނިސްޓްރީގައި ކުރީ ދައުރުގައި އާއި މި ދައުރުގައި މަސައްކަތް ކުރާ ފަރާތްތަކުގެ މި ކަމާ އެއްވެސް ގުޅުމެއް ހުރިތޯ ބަލާނެ ކަމަށް ފުލުހުން ބުނެއެވެ.
މި ފަރާތްތަކަށް ބިން ލިބުނު ކަމަށް ދީފައިވާ ލިޔުމަކީ ސައްހަ ލިޔުމެއް ތޯ ބަލަމުން އަންނަ ކަމަށާއި އެކަން ހާމަ ކުރާނެ ކަމަށް ފުލުހުން ބުނެއެވެ. މި މައްސަލައިގައި މިހާތަނަށް ބެލިބެލުމުގެ ތެރޭގައި ފްލެޓަށް ކުރިމަތިލީ މީހަކަށް ވެސް ބިން ދީފައިވާ މައްސަލައެއް ވެސް ފާހަގަވެފައިވާ ކަަމަށް ފުލުހުން ބުނެއެވެ. މި ދެ ސްކީމްތަކުގެ ދަށުން އެއްވެސް ފަރާތަކުން ގޯހެއް ހިންގާފައިވޭތޯ ނޫނީ މަގާމުގެ ނުފޫޒު ބޭނުންކޮށްގެން އެއްވެސް ކަމެއް ކޮށްފައި ވޭތޯ ބަލާނެ ކަމަށް ފުލުހުން ބުނެއެވެ.
މިހާ ހިސާބަށް އެކި ފަރާތްތަކުން އަދި ސަރުކާރުގެ ވިޒާރާތަކުން ވެދިން އެހީތެރިކަމަށް ޝުކުރު އަދާކުރާ ކަމަށާއި މިއީ ރައްޔިތުންގެ ވަރަށް ބޮޑު ކަންބޮޑުވުމެއް އޮތް ކަމެއް ކަމުން ރަނގަޅު ތަހުގީގެއް ހިންގާނެ ކަމަށް ފުލުހުން ބުނެއެވެ. އަދި މި ފަރާތްތަކަށް ދީފައިވާ ލިޔުމަކީ ކުރީ ސަރުކާރުން ދީފައިވާ ޑޮކިއުމަންޓްތަކެއް ކަަމށް ފުލުހުން ބުނެއެވެ.
މި މައްސަލަ ފެންމަތިވުމުން "ބިންވެރިޔާ" އަދި "ގެދޮރުވެރިޔާ" ސްކީމާގުޅޭ ޖިނާއީ ތަހުގީގެއް ހިންގުމަށް ޕްރޮސެކިއުތާ ޖެނެރަލް އޮފީހުން ވަނީ ފުލުހުންނަށާއި އެންޓިކޮރަޕްޗަން ކޮމިޝަން (އޭސީސީ) އަށް އަމުރުކޮށްފައެވެ. އެހެންކަމުން އޭސީސީން ވަނީ ފުލުހުންނާއެކު މަޝްވަރާކޮށް އަވަސް ތަހުގީގެއް ހިންގަމުންދާ ކަމަށް ބުނެފިއެވެ
މި މައްސަލަ އާއި ގުޅިގެން އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދު ސަސްޕެންޑްކޮށް އަދި ބޯޑުން ވެސް، އޭނާ ވަނީ ވަކިކޮށްފައެވެ. އެންމެ ފަހުން އެޗްޑީސީގެ ޗެއާމަން ކަމަށް އައްޔަންކުރި އަހްމަދު ނާސިފް (ޑީޑީ) ފިޔަވައި ހުރިހާ ބޭފުޅުން މިއަދު ވަނީ ސަސްޕެންޑްކޮށްފައެވެ.
ބޯޑު ސަސްޕެންޑްކޮށްފައި ވާއިރު އައިޓީ ކޮންސަލްޓެންޓް އަބްދުﷲ ޝުހޫދާއި ޗީފް ފައިނޭންޝަލް އޮފިސަރު އަބްދުﷲ ފާއިދާއި ޗީފް ބިޒްނަސް އޮފިސަރު އަދި މީޑިއާ ޑިޕާޓްމެންޓްގެ ހެޑް އަހުމަދު ޔާމީން އަދި ރިއަލްއެސްޓޭޓް ޑެޕިއުޓީ ޑިރެކްޓަރު އަހުމަދު އައިމަން ވެސް ސަސްޕެންޑުކޮށްފައިވާ ކަމަށް ވަނީ މައުލޫމާތު ލިބިފައެވެ.
