މިދިޔަ ސަރުކާރުން ހަދާފައިވާ 9 ސެޓްލްމަންޓް އެއްބަސްވުމަށް އަމަލުކުރަން ނުޖެހޭ ކަމަށް އެޓާނީ ޖެނެރަލް (އޭޖީ) އިން ނިންމައިފިއެވެ.
އޭޖީ އިން ނެރުނު ބަޔާނެއްގައި ބުނެފައިވަނީ ނިމިދިޔަ ސަރުކާރުން 28 ނޮވެންބަރު 2022 ގައި އެކުލަވާލި އުސޫލުގެ ދަށުން ސޮއިކޮށްފައިވާ ސެޓްލްމަންޓް އެއްބަސްވުމަކީ ބާތިލު އެއްބަސްވުންތަކެއް ކަމަށާއި، އެ އެއްބަސްވުންތަކަށް އަމަލުކުރަން ނުޖެހޭ ކަމަށް ބަންޑާރަނައިބު ނިންމަވާ، ކަމާބެހޭ ދައުލަތުގެ އިދާރާތަކަށް މިއަދު އެކަން އަންގާފައިވާ ކަމަށެވެ.
އުސޫލުގެ ދަށުން ސޮއިކޮށްފައިވާ ބަދަލު ދިނުމުގެ އެއްބަސްވުންތަކާ ގުޅޭ މައްސަލަ ރައްޔިތުންގެ މަޖިލީހުގެ މާލިއްޔަތު ކޮމިޓީން ދިރާސާ ކުރުމަށްފަހު، އެ އެއްބަސްވުންތަކަކީ އުފެދުމުގައި ވެސް ބާތިލް އެއްބަސްވުންތަކެއް ކަމަށް ވަނީ ނިންމާފައެވެ.
މާލިއްޔަތު ކޮމިޓީ އިން ވަނީ އެ އެއްބަސްވުންތައް ބާތިލް ކުރުމަށާއި، އެ އުސޫލާއި އެއްބަސްވުންތަކުގެ ދަށުން އެއްވެސް ބަދަލެއް ދީފައިވާނަމަ، އެ ބަދަލެއް އަނބުރާ ހޯދުމުގެ އިތުރުން މިކަމުގައި ހިމެނޭ ފަރާތްތަކުގެ މައްޗަށް އަޅަންޖެހޭ ފިޔަވަޅުތައް އެޅުމަށް އޭޖީއަށާއި ކަމާ ގުޅުންހުރި އިދާރާތަކަށް ދެންނެވުމަށް ފެންނަކަމަށްވެސް ނިންމާފައެވެ.
މީގެއިތުރުން އޭޖީ އޮފީހުން މި މައްސަލަ ދިރާސާކުރިއިރު އެ އުސޫލަކީ ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީއާއި، ގާނޫނާ ހިލާފަށް އެކުލަވާލާފައިވާ އުސޫލެއްކަމަށާއި، އެ އުސޫލުގެ ދަށުން ނިންމާފައިވާ ނިންމުންތަކާއި ސޮއިކޮށްފައިވާ ސެޓްލްމަންޓް އެއްބަސްވުންތަކަކީ، ދައުލަތުގެ އޮޑިޓާ ޖެނެރަލްގެ ބަހެއް ނެތި ވަކި ފަރާތްތަކަކަށް ނުޙައްގު މުއްސަނދިކަމެއް ލިބޭގޮތަށް ނިންމާފައިވާ ނިންމުންތަކެއް ކަން ފާހަގަކުރެވިފައި ވާކަމަށްވެސް ވަނީ ބުނެފައެވެ.
މިއާއެކު ނިމިދިޔަ އެމްޑީޕީ ސަރުކާރުގައި ސޮއިކޮށްފައިވާ ސެޓްލްމަންޓް އެއްބަސްވުންތަކަކީ ބާތިލު އެއްބަސްވުންތަކެއް ކަމަށް އޭޖީ އޮފީހުން ވަނީ ނިންމާފައެވެ.
