ހަފްތާ ބަންދުގައި ރާއްޖޭގެ ހުރިހާ ހިސާބަކަށްވެސް މޫސުން ގޯސްވާނެކަމަށް ލަފާކުރެވޭކަމަށް މޫސުމާ ބެހޭ ގައުމީ އިދާރާ (މެޓް އޮފީސް) އިން ބުނެފިއެވެ.
މެޓް އޮފީހުން ބުނީ މިހަފްތާގެ ހުކުރު ދުވަހު އުތުރު، މެދުރާއްޖެ އަދި ދެކުނުގެ އަތޮޅުތަކަށް ގަދަވަޔާއި ގުގުރުމާއެކު ވިއްސާރަ ކުރާނެ ކަމަށާއި އަދި ހޮނިހިރު ދުވަހުވެސް ގަދަވަޔާއެކު ވިއްސާރަ ކުރާނެ ކަމަށެވެ.
ފާހަގަކޮށްލެވޭ ގޮތުގައި މި ހަފްތާ ބަންދަކީ ސުކޫލުތަކާއި ކޮލެޖުތައް ބަންދު ވާ ދުވަސްވަރަށް ވުމާއެކު ގިނަ އަދަދެއްގެ މީހުން އެކި ތަންނަށް ދަތުރުކުރާނެއިރު، މޫސުމާ ބެހޭ އެންމެ ފަހުގެ މައުލޫމާތު ހޯދާ މޫސުމަށް ސަމާލުވުމަށް މެޓް އޮފީހުން ވަނީ އިލްތިމާސްކޮށްފައެވެ.
މެޓް އޮފީހުން ވަނީ ހއ. އަތޮޅުން ފެށިގެން އދ. އަތޮޅަށްް މިއަދު 15:00 އިން 21:00 އަށް ބޯކޮށް ވާރެ ވެހުމާއެކު ގަޑިއަކު 45 މޭލަށް ވައި ގަދަވާނެ ކަމަށް ލަފާކޮށް ހުދު ސަމާލު ނެރެފައެވެ.
ހުރިހާ ފަރާތްތަކުން އަދި ހާއްސަކޮށް ކަނޑުދަތުރުފަތުރު ކުރާ ފަރާތްތަކުން މޫސުމަށް ސަމާލުވުމަށް މެޓް އޮފީހުން އިލްތިމާސްކޮށްފައިވާއިރު މެޓް އޮފީހުން ވަނީ ކަނޑު ގަދަވުމުގެ ސަބަބުން ކުރިމަތިވެދާނެ ނުރައްކާތަކުން ސަލާމަތްވުމަށާއި ލިބިދާނެ ގެއްލުންތައް ކުޑަކުރުމަށް ރައްކާތެރިކަމުގެ ފިޔަވަޅު އެޅުމަށް އެދިފައެވެ.
