ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް، ވެރިފައި ކުރުމެއް ނެތި ގޯތި ދޫކޮށްފައިވާކަމަށް ތުހުމަތު ކުރެވޭ މައްސަލަ ބަލައިދިނުމަށް ރައްޔިތުންގެ މަޖިލީހަށް ހުށަހަޅައިފިއެވެ.
މި މައްސަލަ މަޖިލީހަށް ހުށަހަޅާފައިވަނީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމްއެވެ. އެ މައްސަލަ ބަލައިދިނުމަށް އެދި މަޖިލީހުގެ ރައީސް އަބްދުއްރަހީމް އަބްދުﷲއަށް އެޑްރެސްކޮށް ފޮނުއްވި ސިޓީގައި ވިދާޅުވީ ދައުލަތަށް މަންފާއެއް ނުވާ ގޮތަށް ދައުލަތުގެ އަގުހުރި ބިންތަކެއް ވިއްކާލާފައިވާ މައްސަލައަކަށްވާތީ މިއީ ވަރަށް ސީރިއަސް މައްސަލައެއްގެ ގޮތުގައި މަޖިލީހުން ބަލަން ޖެހޭކަމަށް ދެކެވަޑައިގަންނަވާ ކަމަށެވެ.
މިހާތަނަށް ހާމަވެފައިވާ ގޮތުގައި އުސޫލުން ބޭރުން 50އަށް ވުރެ ގިނަ ގޯތި ދޫކޮށްފައިވާއިރު އެ ގޯތިތަކުގެ ބިމުގެ ޖުމްލަ އަގު 400 މިލިއަން ރުފިޔާއަށް ވުރެ މަތިވާނެ ކަމަށް ލަފާކުރެވޭކަމަށް މުހައްމަދު އިބްރާހީމްވަނީ ފާހަގަކުރައްވާފައެވެ. އަދި އެ ޖަރީމާ ހިންގާކަން، ހައުސިން މިނިސްޓްރީއަށް އެނގުނުތާ ފަސް މަސްވެފައިވާއިރު މިނިސްޓްރީން އަދި ސަރުކާރުން ވެސް އެއްވެސް ފިޔަވަޅެއް އަަޅާފައިނުވާކަމަށް އެ ސިޓީގައިވަނީ ބަޔާންކޮށްފައެވެ.
މީގެ އިތުރުން މި ސިޓީގައި ވަނީ މިކަން ހިނގާފައިވާ ގޮތް ބެލުމަށާއި މިކަމުގައި ޝާމިލުވާ އެންމެން ދެނެގަތުމާ އެކު، މިފަދަ ކަންކަން އިތުރަށް ހިނގިޔަނުދިނުމަށްޓަކައި އަޅަން ޖެހޭ ފިޔަވަޅުތައް އެޅުމަށް ދައުލަތުގެ ކަމާ ބެހޭ މުއައްސަސާތަކަށް އެންގުމަށް މި ސިޓީގައިވަނީ އެދިފައެވެ. އަދި މި މައްސަލަ ރައްޔިތުންގެ މަޖިލިސް މެދުވެރިކޮށް ބަލައިދިނުމަށް ވަނީ ހުށަހަޅާފައެވެ.
ބިންވެރިޔާ ސްކީމުގައި މައްސަލަތަކެއް އުޅޭކަން ފާހަގަވެފައި ވަނީ ދެ ބިމެއްގެ އިންފާރު ރޭނުމުގެ ހުއްދަ އަށް ހައުސިން މިނިސްޓްރީގައި އެދުމުންނެވެ. ސޯޝަލް މީޑިއާގައި ދައުރުވާ އެ ލިސްޓުން ދައްކާ ގޮތުން ޝަރުތު ހަމަނުވިޔަސް ގޯތި ދޫކުރި މީހުންގެ ތެރޭގައި އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ހިމެނެ އެވެ. ދެން ހިމެނެނީ އަބްދުލް މަޖީދު މާހިރު ނަމަކަށް ކިޔާ މީހެކެވެ.
