ރާއްޖޭގެ އެކި ސަރަހައްދުތަކަށް ކުރަމުންދާ ވިއްސާރައިގައި ނ. ހެނބަދޫގެ 75 ގެއަކަށް ފެން ވަދެފައި ވެއެވެ.
ނޭޝަނަލް ޑިޒާސްޓާ މެނޭޖްމެންޓު އޮތޯރިޓީ (އެންޑީއެމްއޭ) އިން ބުނީ ހެނބަދޫގެ 75 ގެއަކަށް ފެން ވަދެ އެކި ވަރުގެ ބޮޑެތި ގެއްލުންތައް ލިބިފައިވާކަމަށާއި، އެމްއެންޑީއެފް ގެ އެހީތެރިކަމާއެކު ފެން ހިއްކުމުގެ މަސައްކަތް ކުރަމުންދާކަމަށެވެ.
އެންޑީއެމްއޭ އިން ބުނީ މި ހާދިސާގައި ގެއްލުން ލިބުނު ގެއްލުންތަކާއި ގުޅިގެން ބޭނުންވާ ކުއްލި އެހީތެރިކަން ދެނެގަތުމުގެ މަސައްކަތް ވެލިދޫ ވޮލެންޓިއަރުންގެ އެހީތެރިކަމާއެކު ކައުންސިލް މެދުވެރިކޮށް ކޮށްފައިވާ ކަމަށެވެ.
މިކަމާ ގުޅިގެން ހެނބަދޫގެ ކައުންސިލަރު އަބޫބަކުރު މުހައްމަދު "ދަ ޕްރެސް" އަށް މައުލޫމާތު ދެއްވަމުން ވިދާޅުވީ އިއްޔެ ހެނދުނު 6 ޖަހާއިރު ވާރޭ ވެހެން ފަށައި، ގާތްގަނޑަކަށް 7:30 ހާއިރު މުޅި ރަށުތެރޭ އެއްކޮށް ފެން ބޮޑުވެފައިވާ ކަމަށެވެ.
އޭނާ ވިދާޅުވީ، ފެން ބޮޑުވާން މެދުވެރިވީ ދިޔަވަރު ބޮޑު ވަގުތަކާ ދިމާވެ، އެ ރަށުގެ ދެ މަގެއްގައި ގާއިމްކުރި ފެން ހިންދާ ނިޒާމުން މޫދަށް ގުޅާފައިވީ ހޮޅިން ފެން ބޭރު ނުވުމުގެ ސަބަބުން ފެން ނުހިނދަދީގެން ކަމަށާއި، ގޭބިސީތަކަށް ފެން ވަދެގެން ދިޔައީ އެހެންވެ ކަމަށެވެ.
ހެނބަދޫގެ އިތުރުން ނ. ކެނދިކުޅުދު އާއި ޅ. ކުރެންދޫގައިވެސް ވަނީ ފެންބޮޑުވެފައެވެ. ފާހަގަކޮށްލެވޭ ގޮތުގައި މޫސުމާ ބެހޭ ގައުމީ އިދާރާއިން ވަނީ، އެންމެ އުތުރުން ފެށިގެން އދ. އަތޮޅަށް އިއްޔެ ހެނދުނު 11:15 އާއި މެންދުރުފަހު 3 އާ ދެމެދު ގުގުރުމާ އެކު ބޯކޮށް ވާރޭ ވެހޭނެ ކަމަށް ލަފާކޮށް ރީނދޫ ސަމާލު ވެސް ނެރެފައެވެ.
