އައްޑޫ ސިޓީ އިން ފުރައިގެން މާލެ ދަތުރުކުރި ބޯޓެއްގެ ފަޅުވެރިއަކު ގެއްލިގެން، އެ މީހާ ހޯދުމުގެ މަސައްކަތް ކުރަމުން އަންނަކަމަށް ފުލުހުން ބުނެފިއެވެ.
ފުލުހުން ބުނީ އައްޑޫ ސިޓީ އިން ފުރައިގެން މާލެ ދަތުރުކުރަމުން ދިޔަ ސީމެކްސް ބޯޓުގެ ފަޅުވެރިއެއްގެ ގޮތުގައި މަސައްކަތް ކުރާ ބިދޭސީއަކު ގެއްލިގެން ރޭގެ ވަގުތެއްގައި ފުލުހުންނަށް ރިޕޯޓު ކޮށްފައިވާ ކަމަށެވެ.
ފުލުހުން ބުނީ ބޯޓުން ގެއްލިގެން ހޯދަމުން ދަނީ ނޭޕާލު ރައްޔިތެއް ކަމަށްވާ ރާޖު ކުމާރު ނަމަކަށް ކިޔާ މީހެއް ކަމަށެވެ. ފުލުހުން ބުނީ އޭނާ ބޯޓުގައި ނެތްކަން އެގުނީ އައްޑޫ ސިޓީއިން ފުރައިގެން ފުވައްމުލައް ސީޓީ އާ ދެމެދު ކަނޑު މަތިން، ފުވައްމުލައް ސިޓީ އާ 8 މޭލަށް ކައިވެރިވެފައި ވަނިކޮށް ކަމަށެވެ.
އިތުރަށް ފުލުހުން ބުނީ، އައްޑޫ ސިޓީން ރޭ 11:30 ގައި ބޯޓު ފުރި އިރު އޭނާ ބޯޓުގައި ހުރި ކަމަށާއި އަދި ރޭ ދަންވަރު 1:15 ހާއިރު ކެޕްޓަނާ އޭނާ ވާހަކަ ދެއްކިކަމުގެ މައުލޫމާތުވެސް ލިބިފައި ވާ ކަމަށެވެ.
ރާޖު ކުމާރު ހޯދުމުގެ މަސައްކަތް އެމްއެންޑީއެފް އިން ކުރަމުން އަންނައިރު މި މައްސަލަ ފުލުހުން ދަނީ ތަހުގީގު ކުރަމުންނެވެ.
