ހޮންކޮންގައި ކުރިއަށް ދިޔަ ޑައިވިން ރިސޯޓް އެންޑް ޓްރެވެލް ޝޯގައި ފުވައްމުލައް ސިޓީއަށް ބެސްޓް ޝާކް ޑައިވިން ޑެސްޓިނޭޝަން އެވޯޑް ލިބިއްޖެއެވެ.
މި މަހުގެ 13 އިން 15 އަށް ކުރިއަށް ގެންދިޔަ ފެއާގައި ޑެސްޓިނޭޝަނެއް ގޮތަށް ފުވައްމުލައް އިޝްތިހާރު ކުރުމަށް ފުވައްމުލައް ސިޓީ ކައުންސިލުން ވަނީ ގިނަ ހަރަކާތްތަކެއް ކުރިއަށް ގެންގޮސްފައެވެ. ފުވައްމުލައް ސިޓީއަށް ލިބުނު މި ކާމިޔާބީ ފާހަގަކޮށް ޓޫރިޒަމް މިނިސްޓަރު އިބްރާހީމް ފައިސަލް އެކްސްގައި ކުރެއްވި ޕޯސްޓެއްގައި ވަނީ މިއީ ރާއްޖެއަށް ލިބުނު ފަހުރުވެރި އެވޯޑެއްކަމުގައި ވިދާޅުވެފައެވެ.
ދުނިޔޭގެ އެކި ކަންކޮޅުތަކުން 60 އަށް ވުރެ ގިނަ ގައުމު ވާދަކުރި މި އެވޯޑު ފުވައްމުލައް ސިޓީއަށް ލިބިފައިވަނީ އެ ސަރަހައްދުގެ ދިރޭތަކެތީގެ ނަސްލު ގިނަކަމާއި، ފީނުމަށް ދާ ފަތުރުވެރިންނަށް އޮންނަ ރައްކާތެރިކަމާއި، އަމަލުކުރަމުންދާ ދެމެހެއްޓި ގޮތްތަކަށް ރިއާޔަތްކުރުމަށް ފަހުއެވެ.
ފުވައްމުލައް ސިޓީގައި ފަތުރުވެރިކަން ކުރިއެރުވަމަށް ކައުންސިލާއި، ވިޔަފާރިވެރިންގެ އިތުރުން އާންމު ރައްޔިތުން ގުޅިގެން ގިނަ މަސައްކަތްތަކެއް އަންނަނީ ކުރަމުންނެވެ. މިހާރު ވެސް ފުވައްމުލަކުގައި 25 ގެސްޓްހައުސް އޮޕަރޭޓް ކުރަމުން އަންނައިރު، 10 އަށް ވުރެ ގިނަ ޑައިވްސެންޓަރުތައް އޮޕަރޭޓްކުރެއެވެ. ފުވައްމުލައް ސިޓީގެ ޓައިގާ ޝާކް ޕޮއިންޓަކީ ފުވައްމުލައް ސިޓީއަށް ޒިޔާރަތްކުރާ ފަތުރުވެރިންގެ މެދުގައި ވަރަށް މަގުބޫލު ޑައިވިން ޕޮއިންޓެކެވެ.
މި ޓްރެވެލް ޝޯގައި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ/ ވިޒިޓް މޯލްޑިވްސް) އަދި ނެޝަނަލް ބޯޓިން އެސޯސިއޭޝަން އޮފް މޯލްޑިވްސް (އެންބީއޭއެމް) ގުޅިގެން ވަނީ ދިވެހިރާއްޖޭގެ ކަނޑުއަޑީގެ ރީތިކަން ޕްރޮމޯޓްކޮށްފައެވެ.
ޑީއާރުޓީ ޝޯ އަކީ ޑައިވިން އާއި މެރިން ފަތުރުވެރިކަމުގެ ޕްރޮފެޝަނަލުން ގުޅުވައިދޭ ޕްރިމިއާ އިންޓަނޭޝަނަލް އިވެންޓެކެވެ. އެމްއެމްޕީއާރުސީ އިން ބުނީ މި އިވެންޓަކީ ދުނިޔޭގެ ފެންވަރުގެ ޑައިވިން އަދި މެރިން ޓޫރިޒަމް ހަބެއްގެ ގޮތުގައި ދިވެހިރާއްޖެ ފަދަ މަޝްހޫރު މަންޒިލްތައް ޕްރޮމޯޓްކުރުމަށާ އެންމެ ފަހުގެ އުފެއްދުންތައް ދައްކާލުމަށް މުހިންމު ޕްލެޓްފޯމެއް ކަމަށެވެ.
މި ހަރަކާތުގައި ރާއްޖޭގެ ޑައިވިން ސިނާއަތާ ބެހޭ އެންމެ ފަހުގެ މައުލޫމާތު ބީ2ބީ ޓްރެވަލް ޓްރޭޑް ޕްރޮފެޝަނަލުންނަށް ފޯރުކޮށްދިނުމުގެ އެތައް ފުރުސަތެކެއްވެސް ލިބިގެންދިޔަކަމަށް އެމްއެމްޕީއާރުސީ އިން ވަނީ ބުނެފައެވެ.
ވިޒިޓް މޯލްޑިވްސްގެ އަމާޒަކީ ރިސޯޓްތަކާއި ގެސްޓްހައުސްތަކާއި ލިވަބޯޑްތަކާއި ހޮޓާތަކާއި އެކު ޑައިވިންގެ ހާއްސަ ހިދުމަތްތަކުގެ އިތުރުން ރާއްޖޭގެ ކަނޑުއަޑީގެ ތަފާތު ތަޖުރިބާތައް ޑީއާރުޓީ ޝޯގައި ދައްކާލުމެވެ. އެމްއެމްޕީއާރުސީން ބުނީ މި ހަރަކާތުގައި ވަކިވަކި ޕްރޮޕަޓީތަކުގެ އެންމެ ފަހުގެ މައުލޫމާތު ހޮންކޮންގުގެ ދަތުރުފަތުރުގެ ވިޔަފާރިތަކާއި ހިއްސާކުރުމަށް މުހިންމު ޕްލެޓްފޯމެއް ލިބިގެންދިޔަކަމަށެވެ.
ރާއްޖޭގެ ފަތުރުވެރިކަމުގެ ސިނާއަތަށް ހޮންކޮންގަކީ ވަރަށް މުހިންމު މާކެޓެކެވެ. ރާއްޖެއަކީ ޗައިނާ ފަތުރުވެރިންގެ މެދުގައި އެންމެ މަގްބޫލް މަންޒިލްގެ ގޮތުގައި ދެމަހައްޓުމަށް އެމްއެމްޕީއާރުސީއިން އަންނަނީ ގިނަ ހަރަކާތްތަކެއް ހިންގަމުންނެވެ. އެގޮތުން، މިއަހަރުގެ ކުރީކޮޅު 2020ގެ ފަހުން ހޮންކޮންގުން ސީދާ ރާއްޖެ އައި ފުރަތަމަ ފްލައިޓަށް ވިޒިޓް މޯލްޑިވްސް އިން ވަރަށް ހޫނު މަރުހަބާ އެއް ކިޔައިފައިވެއެވެ.
މީގެ އިތުރުން، ޗައިނާގެ މާކެޓުގައި ކުރިއަށް ގެންދިޔަ ހަރަކާތްތަކުގެ ތެރޭގައި ޗައިނާ ވެބިނާ ސީރީޒް؛ ފުޖިއަން އިވެންޓްތައް؛ ޒިއާމަން ފްލައިޓާއި ޗައިނާ އީސްޓަން ފްލައިޓަށް މަރުހަބާ ކިޔުން؛ ރެޑް އާއި އެކު ކެމްޕޭން؛ ޕާޓާގެ އަހަރީ ސަމިޓް ޕެނަލް ޑިސްކަޝަން؛ އައިޓީބީ ޗައިނާ؛ ފްލިގީ އާއެކު އެމްއޯޔޫ ސޮއިކުރުން؛ ޕަޑީއާ ގުޅިގެން ކޭއޯއެލް ފެމިލިއަރައިޒޭޝަން ދަތުރު؛ ގޯލްޑަން ވީކް ކެމްޕޭނެއް ވަނީ ކުރިއަށް ގެންގޮސްފައެވެ. އަދި ޗައިނާގެ މާކެޓަށް އަމާޒުކޮށްގެން ޑިސްކަވާ މޯލްޑިވްސް ވެބިނާ ސީރީޒް ކުރިއަށް ދިޔުން ފާހަގަކޮށްލެވެއެވެ.
